Todo tiene su final

Todo tiene su final
Top Ads
Top Ads

Nada dura para siempre,

Tenemos que recordar que no existe eternidad

E dia prome cu eleccion mi a mira e spot den cual Nelson Oduber a declara cu un politico mester laga un legacia. “Cu ora bo bay for for di politica, bo por core rond mira loke bo a laga atras.” Tur esaki cu droneshots di Ritz-Carlton, Marriott y area di Sasaki. Mike Eman den e sentido ey no ta hopi diferente. Djis mira Green Corridor, Watty Vos Boulevard, Linear Park y e brug. Ambos a lidera gabinetenan cu mayoria absoluto y ambos a ‘crash and burn’ cu nan partido despues di 8 aña. MEP na 2009 pasobra pueblo a fada di un gobierno fragmenta y cansa y AVP na 2017 pa e mesun motibo cu e holo di corupshon como extra bonus.

 

Pero tin un diferencia. Tin algo mas cu a duna forma y color na e resultado electoral di ayera. Berdad cu AVP come #SLA anto duro. Nan a wordo castiga pa e caso Ibis, e asunto rond Leoncita y pasobra basicamente hende a fada di 8 aña di mas scuma cu chuculati. Pero hecho ta tambe cu MEP no a crece dje tanto ey tampoco. E campaña tabata by the book y pa gran parti bon ehecuta, pero na final di dia kizas nan a apela na nan base mas cu nan a purba apela na votadornan nobo? Pasobra ideanan nobo no tabatin riba nan menu. Djis promesanan di drecha cos cu a bay atras.

 

Pero e golpi mas grandi tabata toch pa POR, cu supuestamente tabata e partido di cambio, pero no a perform at all manera nan a spera y hopi hende a kere. Apenas 5500 voto nan a haya na unda e top 3 lo mester a deliver 8000 a lo menos. Dos asiento so nan a haya, ni suficiente pa por entrega mocion den Staten riba nan mes. Esaki particularmente mester haci Andin Bikker cu tabatin e mesun problema cu PDR, extra dolor…E sorpresa grandi cu tanto a wordo priminti riba Power FM no a bin di POR pero for di ambos RED y RAIZ, partidonan chikito sin e budget cu AVP, MEP y POR tabata dispone di dje. RAIZ no a yega na un asiento pero a haya 2000 y pico voto. RED keda den un dead heat cu POR pa basta rato y a claba nan asiento flush, mientras cu POR no a yega mas leu cu un asiento y un restzetel. Manera e dicho ta bisa; Men lie, women lie, numbers don’t.

 

Awo, djis imaginabo si RED y RAIZ lo a combina lista. Mi sa cu tin diferencianan fundamental entre nan mescos cu tabatin similaridadnan. Pero djis pensa kico lo a pasa si e restzetel a tambalea pa otro banda. Otro gai lo a canta completamente.

 

Como el campeón mundial dio su vida por llegar y 
perder lo mas querido en la masa otro mas,

 

Papa soda di e calor infernal di e dia cu a pasa y cansa manera un boxeado cu a bay full 12 round pa finalmente haya un golpi di gracia te na ultimo, Mike Eman a anuncia su retiro como lider di AVP. Cu e berdad sunu su dilanti un biaha mas, Mike a laga e lenguahe di campaña un banda y a bisa flat cu e caso di Paul Croes probablemente a causa hopi hende di AVP mes pa keda cas y cu e mes a spera riba 11 asiento pero a keda canta 15 pa mantene animo den e militancia. Cu a baha te 9 asiento a gara Mike di sorpresa y na dado momento, ora cu no tabatin mas awa pa laba den marduga, ela dicidi cu e ta bay hala atras como lider. Ambiente na Cas di Partido tabata uno di luto, no di rabia. No tabatin cobamento di mama ni un ambiente di rencor y venganza. Esey mi a mira na un otro cede. E despedida di Mike tabata genuinamente conmovedor. Ela baha na awa, pero no sin hinca un ultimo dede fiho y diep den posterior di su ex-colega minister.

 

AVP ta scohe cu un move di aikido pa hala un banda, bay den oposicion y recarga bateria anto purba reinventa su mes den e periodo cu ta bin. Esaki ta laga Otmar oduber su so riba pista cu Evelyn. E lo no bira e kingmaker cu e kier a bira. Lo no bay tin un bidding war pa su participacion. E lo bay tin cu tuma loke e ta haya di MEP. Mi lo kier bet cu te hasta lo mester bay sinta na mesa anto fake hari un rato cu RED, e partido cu a start Oduber su persecucion den caso FDSN y cu a kibra su ilusion ayera. Cu dos of tres partido den gabinete, e bachi lo bay keda preta pa tur. MEP, cu a haya su chens atrobe, lo mester cumpli cu e mandato pa por sigui crece den proximo eleccion y POR lo no por hunga e wega di ‘si no fono’ asina libremente. Pasobra si pone gobierno cay sin tin un base amplio di confiansa, cu un perdida di voto bisto compara cu 2013, unda nan lo por bay? No tin bista riba crecemento anto AVP lo saca man pa nan tampoco. No, ami ta kere toch cu POR lo keda hunga netjes segun su limitacion di forsa anto yuda wanta e gabinete stabiel. Corda tambe cu e votonan cu nan tin – pa no papia di nan sponsornan cu a hinca un bon suma di placa den e partido y cu awo mester schrijf e aventura aki como un perdida – ta conta cu lo bay cumpli cu nan lo mas cu por.

 

Oigo una voz que me dice

cuidado tierra va a temblar, tierra va a temblar

 

Finalmente algun consideracion pa e futuro prome minister di Aruba. Por cierto e prome Minpres femenino, ya cu mi ta kere cu si Dangui Oduber y Glenbert Croes berdad haya mas voto (locual ta mustra), nan lo haci lo corecto y caballeril y laga e convenio di partido un banda pa duna nan lider e honor. Mi interpretacion di e numbernan ta cu electorado – anto no djis e millennials, djis wak con menos bandera y sticker cu tshirt tabatin durante campaña – ta mustrando un cambio di mentalidad y ta exigi good governance, mas transparencia y un gobierno liber di corrupcion, nepotismo y vriendjespolitiek. MEP a campaña cu esaki. POR y RED tambe. Gobierno awo mester duna duna realse na esaki y tuma pasonan concreto. Sera e cranchinan unda corrupcion di ambtenaar ta tuma lugar. Un manera pa haci esaki ta pa pone vakminister riba e ministerionan di infrastructura y imigracion y start un proceso di kita firma di minister – pues depolitisa – for di DIP, DIMAS, vergunning di taxi, basicamente tur cos cu tradicionalmente ta cumpra bou di mesa. Pone rijnan di espera y publica nan. Sera e negoshi. Mata e golden goose. Nada menos cu esey ta loke ta rekeri. Es mas, lo mester duna e bon ehempel y haci tur esaki pa ora cu e investigacionnan politico a la FDSN cuminsa contra miembronan di gabinete saliente.

Top Ads
Top Ads

About The Author

Related posts

1 Comment

  1. Randolf

    No exclui e opcion di AVP-POR ainda. Laga e huma di bataya di eleccion baha un poco. E ora e partidonan (vooral AVP) lo pone e pro’s and cons banda di otro. Tin demasiado hende (coordinadornan) cu tin demasiado di perde si AVP no bin bek den gobierno (Mike Eman ta cla, pe no ta problema). Ami ta mira cu e “zet” di retira ta habri caminda pa un otro lider, cu probablemente lo bira Richard Arends (jong y inteligente). Anto e ora link AVP-POR ta facil door di Simon Arends. Otmar ta desapunta, dia ela laga AVP ela kere cu su partido nobo lo bira un partido di 5 of mas asiento, consistiendo di candidatonan popular di AVP, PDR y tambe MEP. Pero e no a logra haya candidato di MEP. Awo e ta na 2 asiento, dus un partido chikito, Andin no ta give a shit, basta porfin e haya chance di drenta gobierno. Y na Aruba nos ta lubida liher. E hacha ta wordo dera hopi facil y cu e PR Machinenan mas grandi nan tras, un bunita storia lo wordo presenta na “bienestar” di Aruba. And the party goes on !!

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.