CMB BD

Awel ban midi forsa anto!

Top Ads
Top Ads
Top Ads

Ora mi a yega Cas di Partido diahuebs anochi, e ambiente tabata poco tenso. Tabata basta laat caba y MEP a anuncia su lista caba. Pero nada ainda di e partido berde. Mi a topa y papia cu Michael Lampe, Richard Visser, Richard Arends y Clayton Croes. Mi a wak Edu Vos papia masha concentra mes den su telefon. Tambe mi a mira Arondino Croes, papiando cu un par di hende. Poco rato despues di baina mi por a contene mi harimento ora mi a haya sa cu net Arondino tabata esun cu tabata trancando e finalisacion di e lista. Aparentemente e number cu e candidato di Sta Cruz a haya no a cay na su agrado y e tabata insisti riba un puesto mas halto riba e lista (hopi mas despues mi lo haya di compronde cu nan a ofrece number 23, mientras cu e mes tabata kier 11, puesto cu na final a wordo otorga na Michael Lampe den su prome salida como candidato politico, anto riba dje on track pa bira minister di Cultura si AVP gana).

 

E tension a crece ora cu lider di partido y un par di su ministernan a yega porfin y a drenta Cas di Partido. E prome candidatonan a drenta despues pa haya nan number. remarcabel tabata ora cu Jennifer Arends-Reyes diripente a sali cu un grupo grandi di sostenedor for di Cas di Partido, sin para of bisa algo anto stret pa cas. Mas laat lo sali na cla cu ela haya nr. 10, locual a masha respectabel. Pero di Jennifer tabata conoci cu den campaña e tabata profila su mes como candidato pa minister di Enseñansa. Richard Visser sinembargo a haya preferencia pa e puesto aki.

 

Tabata rond di 1or di marduga caba ora Mike Eman a anuncia e lista definitivo di AVP. Loke ta resalta, fuera cu Arondino a cay afo, ta con parlamentarionan cu a duna servicio na 2009 y 2013 a haya palo na 2017. Obviamente bo tin cu renoba, pero un Donny Rasmijn, cu compara cu mayoria di su coleganan si a saca cara activamente pa leynan progresivo – esun di cacho y di saco di plastic pa ta exacto – a merece un miho destino cu nr. 23. Mescos ta conta pa Désirée Croes cu, tambe si bo laga e asunto di Geregistreerd Partnerschap afo, casi semper tabata trece extra contenido na e fraccion berde. Un otro inconsistencia fuerte riba e lista di partido berde ta cu net candidatonan hoben y cu contenido manera Clayton y Gerlien Croes a keda pega na 19 y 18, cu bochincheronan di politica bieuw manera Clarisca Velasquez y Melvin Tromp mas halto cu nan. Particularmente pa Gerlien Croes, cu a wordo uza – sorry, mi no tin otro manera pa bisa – pa tene lider di partido pafo di e debate di millennials, esaki ta parcemi extra amargo.

 

Mas prome den anochi, MEP a anuncia su lista di candidatonan na nan Cede. Pero atardi caba e top 10 a leak pa 90%. E unico cambio cu a tuma lugar den e top 10 entre e leak y e anuncio oficial tabata cu Rocco Tjon a haya number 8 y Arthur Vallejo, cu tabata riba 8 prome, a haya 29. Aparentemente nan kemen cu e dokter tin aden pa bay saca su mes. Riba e lista di MEP tambe tin diferente curiosidad. Pa cuminsa Guillfred Besaril, cu apesar cu ela haya su mes atacha den controversianan y acusacionnan basta mahos a haya nr. 6. Chris Romero, cu na 2013 a logra practicamente 1000 voto menos cu e nr. 3, a schuif un puesto abou, apesar di presion fuerte cu segun diferente fuente ela pone pa keda unda e tabata. Romero, cu na dado momento a wordo aserca te hasta door di AVP pa bula cura a la Gerrick Croes, no a figura fuerte at all como parlamentario durante e ultimo cuater añanan. Toch ela keda te hasta un puesto mas halto cu Dangui Oduber, mientras cu otronan cu no a perform mester a baha na awa. E candidato di San Nicolas pues no tin net nada pa kiek. Anyway, Xiomara Maduro, cu si tabata move den Staten, a haya e nr. 2 cu eigenlijk e tabata supposed di haya na 2013 caba si no tabata pa e machismo tradicional cu ta reina den MEP. Dos muhe den top di un partido cu militancia conservativo ta un hazaña, con cu bo wak e. Palo a cay tambe riba e lista geel. Ady Thijsen a wordo relega pa nr. 13, causando cu e comision di MEP den Savaneta den cual su famia tabata figura, a entrega nan retiro. Sueann Ras, otro Savanetero, no a yega mas leu cu nr. 15 locual, ban ta franco, no ta un shock grandi tampoco. Palo tambe pa Sharlene Starke cu tabata mas visibel den campaña cu por ehempel un Shailiny Tromp-Lee (cu segun mi a tende no a keda mucho happy cu nr. 12 apesar cu di baina bo a wak of tende algo di dje), a keda pega na nr 18. Pero e palo mas grandi tabata pa Eddy Paris, cu hayando nr. 22 por a wel di keda sin hinca su curpa den politica.

 

Pa loke ta e lista di POR, e protocol cu candidatonan a firma a haci cu number no ta relevante eynan. Wel, si no tabata obvio prome, ta mas cu cla awo ken ta nr.1 den e partido. Te eynan tambe e aspecto di drama den e partido blauw. Laf ohm! E lista mes tin un par di curiosidad, manera Andriani Geerman cu ta propone cannabis medicinal y e bringador di MMA Gregory Milliard. Mas ainda tabatin e inclusion di e cantante Edjean Semeleer. Kico nan efecto lo bay ta pa loke ta voto, ami no sa.

 

Awo pa e entrega di lista. Na prome instante mi no kier a bay. Mi a keda riba cama paso ma bay drumi mucho laat (danki Arondino) y cu tur respet mi no tabatin mucho gana di para den calor y wak RED, MAS, CURPA, ABO y e combinacion UPP/PPA (Papupapa!) entrega nan lista. Sorry. Despues cu mi a parkeer mi auto, mi a cana bay Wilhelminastraat y mi a nota cu e caravana di MEP ya tabata pasando. E energia tabata palpabel for di Checkpoint Color caba. Ora mi a drenta den e grupo pa filma cu mi telefon, no solamente mi a nota con grandi pero mas ainda con anima e contingencia geel tabata. Dia mi a yega Aruba na cuminsamento 2009, MEP tabata ‘on its way out’. 8 aña den gobernacion a laga e partico cansa y den conflicto cu otro. E ambiente tabata uno negatiovo tempo aya y na 2013 e no tabata mucho diferente. Pero diabierna, hasta cu e lista aki cu no ta esun mas fuerte, MEP a mustra un otro cara. E fracasonan electoral, prominentenan cu a bandona e partido, e transicion na un lider nobo cu riba dje ta un ser femenino, tur esakinan a parse di a cay manera un peso grandi for di lomba di cada un di e hendenan aki. E partido mes no a cambia echt, pero e ta atrobe den e parti di e ciclo natural di politica na unda e e añanan di secura a termina y e biento ta den lomba un biaha mas. Den henter e massa geel ey cu a pasa den Wilhelminastraat, niun hende tabata ehemplarisa e alivio y alegria aki mas cu Nel Oduber. E ‘Chubato Bieu’ di e partido – bo ta corda su discurso tur rabia despues di e derota na 2009? – no por a kita su sonrisa for di su cara, y e no por a stop di saluda hende na caminda pa Stadhuis.

 

Lagami bisa di biaha tambe cu henter dia e ambiente tabata uno ehemplar. Un grupo grandi di mepista a keda hang around despues di entrega di nan lista, mientras cu e parada di POR tabata den yega. E bista tabata algo similar na ora cu e fanaticadanan di dos team den final di Champions League ta serca di otro. E por bay of fout of bon. Akinan ela bay bon. Anto ora cu e parada di AVP a pasa ela keda bon. Tabata hopi calor. Mucho calor pa bebe of busca problema cu otro. Pero tambe tabatin algo den aire cu tabata dicta cu nos tur tabata pasando mucho dushi hunto pa by bringa cu otro awo. Anto eynan mi a realisa algo hopi importante. Ami semper, anto sigur den ultimo simannan, a haci mofa di e aspecto carnavalesco di nos proceso electoral. Entrega di lista ta un carnaval ridiculo, etcetera. Y te na un cierto punto e ta ridiculo. Pero e ta parti di ken nos ta y ora nos hacie bon e ta saca e mihor di loke nos Arubiano tin den nos, cual ta amistad cu otro. Anto juist e cambio di localidad a forsa nos pa yega serca di otro atrobe. Pa mira otro den wowo atrobe en bes di sinta ataka otro di leu riba Facebook. Anto pa esaki mi kier duna mi elogio na Conseo Supremo Electoral y Censo, cu a persevera den mantene e localidad aki. Si ta p’ami, esaki ta e tradicion nobo; Nos ta topa otro na Stadhuis. Y nos ta pasa bon, celebrando democracia.

 

Bek pa e paradanan. Loke tambe mi a realisa tambe porfin tabata e aspecto di midimento di forsa. Partidarionan a purba splicami hopi biaha dicon nan ta bay na grandi pa entrega lista y dicon nan ta organisa parada. Naturalmente esakinan no ta factornan decisivo. E aña aki tin dos debate mas riba agenda, e paradanan di e partidonan y corda bon cu den e ultimo simannan e partidonan grandi ta hunga nan cartanan clave. Pero e prome midimento di forsa aki tabata importante. Awo tur hende sa for di cua posicion ta ranca sali pa e ultimo sprint. Anto diabierna mi a wak e y mi a sintie. Cuminsando cu POR. E manada blauw a yega cu hopi ambiente, pero e size di e grupo no a yega ni mitar di esunnan di MEP y AVP. Esey tabata algo cu toch a keda pega. POR a inverti hopi placa y energia den e campaña aki. A haci tur cos pa aparenta di tin e mesun size y recursonan di e dos partidonan tradicional. E entrega di lista a mustra sinembargo cu nan tin un bon caminda mas pa bay ainda pa yega eynan.

 

Despues di e entrega di lista di POR, mi a sali bay cana den direccion di e parada di AVP cu ya a drenta Wilhelminastraat. na altura di Mario’s Sportshop mi a topa Tai Foo Lee y Ursell Arends di RAIZ riba nan bicicleta , acompaña pa tres agente policial. Nan tabata bisti den nan matching outfits y nan tabata den pura, pasobra nan tras e tormenta berde tabata ronca. Te hasta un biento duro a lanta den Wilhelminastraat. AVP su parada tabata un tiki menos grandi cu esun di MEP, pero mas tanto e energia tabata diferente. Fiesta tabatin sigur, pero tabata falta net e tiki extra animo di momentum. E jubilo di e victoria casi garantisa di 2009 no tabata eynan mas. Despues di e entrega, politiconan y un bon parti di e sostenedornan a aglomera riba e Plaza Padu cu nan gobierno a construi. Nan dispersa y bay cas bek basta lihe despues. Den Stadhuis mientras tanto, uun gran alivio y satisfaccion tabata reina. E dia tabata un exito. Aruba a sali gana.

Top Ads
Top Ads
Top Ads

About The Author

Related posts

1 Comment

  1. @carole_oh

    Mi ta comparti bo pensamento over di e aspecto carnavalesco di nos eleccion. Loke si mi ta goza di nos ta cu un cantidad grandi ta bay vota. Si bo compara esaki cu Merca of Hulanda nos ta saca cara.

    Mi a ripara cu hende den prensa a bisa cu tawata un ‘sorpresa’ cu Xiomara a haya number 2. Dicon? E tawata e di dos votegetter di MEP na 2013, e tawata activo den parlamento, e la merece esaki.

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.