CMB BD

Vacuum

Vacuum
Top Ads
Top Ads
Top Ads

Lagami bisa prome cu tur cos cu ami a yuda e grupo cu ta organisa e debate di awenochi. Mi ta hopi orguyoso di e hobennan professional aki cu a haci todo por todo y a logra di hinca un debate den otro cu ta fair y al caso. Mi ta sigur cu awenochi lo bay tin un evento exitoso na unda e gran causa di informa nos pueblo lo bay wordo sirbi.

Cu prome minister y lider di AVP Mike Eman lo no participa ta un desapunto grandi. Obviamente pa e organisacion pero sigur tambe p’ami, aunke cu e no a cay completamente manera un sorpresa. Despues di e prome debate di KvK mi a tene combersacionnan informal cu conseheronan di Mike Eman, den cual mi proposito tabata pa convence nan pa laga nan lider participa. Directamente despues di e prome debate nan tabata kier a participa. Es mas, e debate di millennials tabata esun cu sigur nan kier a gana, asina Philippe La Reine a sigurami. Pero poco despues e actitud ey a bolter completamente. Stijn Janssen lo tabata di opinion cu un debate den cual Eman lo mester enfrenta 9 otro politico nunca lo ta fair pa su candidato. For di mi diferente combersacionnan cu Janssen a sali na cla cu su punto di bista personal – lagami enfatisa e palabra ‘personal’. Na final partijraad di AVP a dicidi pa Eman keda afo. E motibo dicon mi ta menciona su punto di bista ta cu na final e ta consistente toch cu cosnan cu a wordo bisa y accionnan cu a wordo tuma – ta cu den un debate asina, tur otro candidato lo bula riba Eman y di baina e lo por haya oportunidad pa defende su maneho, corda pa presenta su programa. Riba dje, si otro lidernan ataka Eman y e lo ataka bek, esaki lo coste votonan manera na 2013 despues cu ela ataka lider di MEP directamente durante debate di KvK. Argumentonan strategico aki mi por compronde te na un punto. Mas cu claro cu bo kier purba di tene bo lider di partido ‘out of harm’s way’. Bo kier tene illeso y leu di tur controversia te na ultimo, ora bo los bo bomnan pa convence e electorado cu di berdad Berd’e ta. Pero e no por ta asina cu bo ta laga bo lider core campaña so den un vacuum, den situacionnan perfectamente controla. Percura te hasta cu unda cu e tin cu defende su maneho, tin suficiente partidario den sala pa minimalisa e chens cu un hende ta cuestiona algo. Laga departamentonan pone gag order riba ambtenaar pa nan no critica minister of gobierno riba social media.

Segun Janssen e plan ta pa Eman keda mantene su mensahe positivo te cu eleccion. Si bo compara cu e campaña di 2013, esaki ta klop. Tempo aya, Eman tabata tuma cada oportunidad pa mustra riba Evelyn Wever-Croes, su tata, su ruman, etcetera. Pa e campaña aki e ta abstene di esaki y ta bay cana den barionan cu su crew di Facebook live of ta bay wak Richard Branson kitesurf na Malmok. E trabou sushi di calumnia y difama hende e ta laga pa su minions den Bestuurskantoor y den Cas di Partido. Tin biaha, manera ayeranochi na unda ela acusa organisadornan di e debate di tin un ‘agenda’, Mike (of miho bisa e persona cu ta manage su account) ta lubida e plan. Pero di biaha e ta recapacita y delete e comentario.

Na final ami mes no tabata envolvi den e combersacionnan cu La Reine y Janssen tabatin cu lider di di organisacion die e debate, Queen-Anne Bergen. Loke mi sa si ta cu nan a purba konkel diferente manera pa duna nan candidato un bentaha (locual tambe ta di compronde, nos no ta mucha chikito tampoco, pero te na un punto). Ora cu nan a nota cu nan lo haya e mesun trato cu tur otro partido, nan a sugeri pa Gerlien Croes bay en bes di Eman. Bergen, semper cu sosten di e grupo cu a yude organisa e debate, a keda para duro riba e principio cu esaki ta un debate di lidernan di partido, organisa cu e proposito pa informa millennials. No un debate na unda candidatonan millennial lo mester debati otro. Basicamente, Gerlien Croes den su prome biaha como candidato politico a wordo manda pa un tarea na unda e lo mester defende maneho di gobierno y plannan di su partido den un debate contra politiconan experiencia. Mi ta convenci cu Mike Eman mes lo tabata mas cu apto pa e tarea aki. Gerlien sinembargo obviamente no tin e flight hours of e peso di experiencia ainda pa hacie. Mi ta sigur cu un dia si e lo por. Mi ta kere cu AVP mes sa esey masha bon tambe y a uza Gerlien como dealbreaker pa saca nan curpa for di e debate y laba nan man bisando cu organisadornan di e debate ‘no kier un millennial debati den un debate pa millennial’. Si berdad esey ta bo posicion ta pasobra bo no por lesa of compronde. For di eynan tambe e resto di acusacionnan a lanta. Awo organisadornan lo a wordo cumpra dor di POR. Sorry, pero mi cheque no a drenta ainda 😉 Mi kiermen ban serio si, si bo kier tira e oportunidad aki afo y no participa paso bo kier trata bo lider di partido mane e ta traha di porcelana, awel para pa bo argumento. Actua manera un adulto en bes di yora y bin gaña riba esun cu no a dunabo bo kier.

Francamente ami ta puntra mi mes kico Mike Eman mes ta haya di tur esaki. Sure, mi a post un special di roast chicken na supermercado riba mi wall pero den tur honestidad ami no conoce Minpres como un homber cobarde at all. Es mas, mi a scirbi caba – y mi a bisa e guynan di AVP – cu mi ta kere cu e lo por haci un bon papel den e debate. E ta un bon orador y e por engage hende masha bon. Mike Eman no ta traha di glas, e no ta cobarde y sigur e no ta bobo. E mes sa tambe masha bon cu politica y goberna ta encera defende bo maneho riba un podium publico. Tambe contra 9 otro hende si mester. Loke si mi ta puntra mi mes ta si berdad e tambe ta kere cu djis keda evita confrontacion y defensa di su maneho ta e miho strategia. Obviamente e mes tambe lo mester a nota e backfire masal cu tin awo contra su persona.

Mas ainda, mi ta puntra mi mes con su gevoel ta permiti pa e no saca cara na e lugar y momento fiho unda cu ta su deber moral como lider di su partido y lider di nos pais pa haci esaki. Y mi ta puntra mi mes, cu tur su debido respet, kico su tata Shon A. Eman cu net awe a fayece 50 aña pasa, lo pensa di tur esaki. Kico e lo a conseha su yiu. Mi ta bon consciente di e posibel crueldad di mi ponencia. Ami mes no por imagina un bida sin mi tata, cu na bieuw ainda ta dunami e gran luho di su conseho y experiencia. Sinembargo – y un biaha mas cu tur respet – mi no por imaginami mes cu Shon A., cu den su tempo a debati duro contra gezaghebber y den Raad van Politie, lo no bisa su yiu pa gewoon bisti e bachi ey y bay Cas di Cultura. Mi no por imagina un mihor tributo.

Top Ads
Top Ads
Top Ads

About The Author

Related posts

2 Comments

  1. Gino

    Arien, pa cuminsa bo ta haci bo mesun credibilidad como periodista, blogger, influencer wat dan ook un big DISSERVICE. Abo y Mike cu LaReinne ta asina un mengelmoes cu bo no sa unda manipulacion ta caba of caba y bo ‘integridad profesional’ ta cuminsa.

    Abo ta un millenial (?) cu ta HUSA un systema cu boso mes ta CONDENA na boso ventaha. P’esey bo por bisa jokingly cu “e check ey [POR] no a drenta ainda”, pero esun di AVP si a drenta caba? Ta haci dificil pa mi convence hende cu abo no a pasa e preguntanan adelanta na Mike. Pasobra si esey tabata e strategia, manera bo a bisa anto AVP nunca lo a stem toe pa participa NI NA CUMINSAMENTO. Do your job man!

    Reply
  2. Stan

    Mi a keda hopi asombra cu abo a yuda e grupo aki, y toch e resultado tabata asina desapuntante pa hopi, hopi hende mes. Mi a falta e aspecto critico y un concepto nobo cu balor di contenido. Tur e show y hype aki ta ‘ouwe koek’. Un strak geregisserde show riba un stage di teatro, pa cua a cobra hopi placa di entrada pa por a bati riba propio pecho cu kritiekloze trots, despues pa para saca selfie y cana hi-five e gran puppet master. Cosnan ta asina obvio pa esnan cu no ta on a leash. Tanto desordo pa un partido cu, cu tur rason y cu tur derecho, no a participa na un fake debate (Fake-advertisement’ ta castigable den cierto paisnan). Ni ora un Minister a traiciona y sali fe Gobierno hincando pais Aruba den problema serio, tabatin tanto gritamento histerico asina. Y hamas mi a tende di un organisacion cu tanto miedo pa un candidato nobo cu pa colmo ta un milenial mes tambe. Plannan tras di cortina mester a wordo stroba masha hopi mes. Enfin, como debate: Bon organisa – pero mescos cu un marcha militar ta bon organisa-, pero inhoudelijk un aanfluiting completo sin ningun rason pa bati riba propio pecho asina duro. Tabatin momentonan di hilaridad…pero no ta tur eleccion ta asina? Ban spera cu e milenialanan den nan totalidad – no e grupo chikito aki so – por brinda un mihor futuro pa nos comunidad cu loke a wordo tresi riba esena e biaha aki. Mi ta echt spera cu Den Cayente lo organisa su propio debate real. Now that would be something to look forward to.

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.