CMB BD

Famia di hende

Famia di hende
Top Ads
Top Ads
Top Ads

Pinta ‘Aruba Pro Pedofiel’ tur caminda no ta resolve net nada. Ya hopi tempo pasa e palabranan a perde nan impacto y e acto ariba su mes no tin net nada mas di haber cu proteccion di mucha of hisamento di castigo, si no mas cu e ego di e persona(nan) cu ta haci e pintamento. Awo ta Bushiribana, mayan otro caminda super-visibel nan unda lo no haci nada otro cu irita mayoria di pueblo y kita e discusion for di e topico di abuso di mucha, manteniendo e focus firmemente riba esun di vandalismo. Pasobra e topico mes di abuso sexual di mucha y su causa den nos comunidad no ta wordo mishi cune. E ironia ta cu juist asina, e abusadornan di mucha ta gana.

Ban duna e palabra ‘pedofiel’ cu ta skirbi cu letter grandi tur rond di Aruba su contexto y nificacion bek. Pasobra manera e ta awo – si acaso ainda e palabra ta impactabo ora bo mire – e palabra ‘pedofiel’ ta representa un persona anonimo. Hecho ta sinembargo cu mayoria di caso aki na Aruba, esun cu ta comete e actonan aki ta juist un persona di confiansa, hopi biaha tambe un persona den famia. E welo, e omo, e tata, e padrastro, e primo, e ruman. Ta nan ta e pedofielnan. No un hende misterioso y desconoci cu a drenta bo cas y a pasa man pa bo yiu. Lagami ripitie un biaha mas: E welo, e omo, e tata, e padrastro, e primo, e ruman. Cambia e ‘o’ pa un ‘a’ na final tambe por si bo kier. Lese un biaha mas. Lage traha riba bo. Eynan ta e prome stap.

Hecho ta cu mientras cu nos no mira nos mes den spiel y otro den cara, mientras cu nos no durf di puntra nos mes pakico asina hopi caso di abuso sexual di mucha aki na Aruba ta den esfera familiar, nada lo bay cambia, ni con halto bo ta hisa e castigo. Mientras cu nos no admiti cu e nucleo di e problema ta den nos mesun famianan y nos mesun cultura y permisividad, hende por keda verf riba tur muraya, pero nada lo bay cambia y cada tanto tempo nos lo keda tende di casonan hororoso.

Ta pa e motibo ey cantidad di hende ta sclama pa hisa castigo pero ainda ta para defende personahenan conoci cu ta cay den noticia.

“E tin talento.”

“E ta un homber di Dios.”

“Awendia ora bo sali anto topa un chick, miho bo pidi pa su ID.”

Mas importante ainda, ta pa motibo di e cultura y mentalidad aki te dia di awe no tin un protocol efectivo den sistema judicial y di cuido medico cu ta percura pa pruebanan di abuso wordo colecta di biaha. Ni cu tanto caso nobo cada rato. No tin un ombudsman pa mucha na Aruba tampoco. Pa motibo di e cultura y mentalidad aki no ta inverti – na grandi – den instancianan di ayudo, por ehempel cuido mental, of den calidad di nos educacion. Niun di esakinan, cada un di nan pasonan berdadero y concreto cu por tuma pa protehe nos muchanan, ta un prioridad pasobra nos manera di pensa y nos cultura no ta mira esakinan como prioridad. Niun gobierno te aworaki – ni esun aki ni di e partidonan cu ta yama awo pa hisa castigonan – a implementa e pasonan aki.

Cu mester hisa castigo y aplica strafmaat tambe ta absolutamente necesario. Pero djis haci esey anto nada mas lo no haci net nada contra e problematica di abuso sexual di mucha den nos comunidad chikito y sera. Pasobra den henter e discusion cu ya caba ta tumando lugar un par di aña caba, e topico cu ta mas importante semper ta wordo evita. Cantidad di hende tin asina un boca, pero toch ta cana cu un bocht grandi rond di e causa, e nucleo duro, pisa y doloroso di e tema di abuso sexual di mucha. Dicon? Pasobra ta trata di famia di hende. Pasobra ainda Aruba conoce un cultura di berguensa.

Top Ads
Top Ads
Top Ads

About The Author

Related posts

1 Comment

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.