CMB BD

#Campaña2017: Esun cu POR, POR

#Campaña2017: Esun cu POR, POR
Top Ads
Top Ads
Top Ads

Den Cayente a start como blog riba e tema di campaña electoral. Na 2009 y 2013 a sigui y opina riba e acontecimentonan y intriga di e temporada y na 2017 lo haci esaki mas extensamente cu nunca y na Papiamento. Nos ta ranca sali cu e fundacion di e partido nobo di ex-minister di Turismo Otmar Oduber, POR.

 

Diadomingo mainta, aproximadamente un ora mas laat cu planea, a funda e partido nobo Pueblo Orguyoso y Respeta (POR). A scohe pa haci un evento den Cas di Cultura riba diadomingo mainta, cual a resulta den un sala toch basta yen y un ambiente kizas net un tiki dimas solemne (of a lo menos mas cu ta custumber na Aruba). E programa bou presentacion di Ruben Garcia – antes e voz di casi tur propaganda di AVP – tambe tabatin un approach diferente, mas den e tradicion Mericano na unda amigonan y sernan stima ta introduci e candidatonan. A pesar cu no start na ora, e aankleding audiovisual di e evento tabata sin gap y on point – manera por spera di hendenan cu añanan di experiencia den carnaval cu grupo TOB -, cu videonan profesional, musica y un Rosabelle Illes cu a declama poco poema, acompaña pa Mo Mohamed riba su tambu. E introduccionnan y mas ainda e speechnan di e candidatonan tabata hopi mas cortico cu loke bo ta tende usualmente. Joslin Croes, Jacqueline van Putten y Michella Steenvoorde-Laclé a presenta nan puntonan sinembargo na un manera basta cla. Bo sa kico nan kier para p’e. Esey te ainda no por bisa ainda di e candidato nobo cu a wordo presenta na final di e evento, ex-tv anchor Ronny Maduro.

 

Toch un sorpresa den esaki tabata e speech di Andin Bikker, cu no a bay mucho mas leu cu bisa danki na su famia. Bikker, cu ban ta franco no ta e orador publico mas potente, a zona flat y no a trece ningun punto di programa dilanti, lagando esaki pa Otmar Oduber y asina dunando forsa na e kehonan di hendenan di PDR cu a keda desapunta despues cu ela dicidi pa join e partido cu POR. Dunando forsa tambe na e e percepcion cu henter e cuenta di liderasgo combina ta mas tanto algo cosmetico y cu Andin Bikker a settle pa sinta den backseat y laga Oduber ta esun tras di stuur. Pasobra ta Oduber mes tabata esun cu den su discurso na final a tuma su tempo pa delinea puntonan di programa, te hasta bisando “Andin, this is your job!” ora cu a papia riba aspectonan di husticia. Bikker a djis lanta su duim afirmativamente riba esaki. Esaki no mester ta un issue riba su mes, pero por imagina cu si Bikker kier hiba su votadornan pa su partido nobo, e lo mester step up su game y tambe haya e espacio pa por haci esaki.

 

Mientras tanto, loke Oduber a trece dilanti durante su discurso tabatin su puntonan di interes. Particularmente e puntonan di financiamento di campaña – Oduber a apela un biaha mas riba Bikker, pidiendo e pa pusha tratamento di e Wet Financiering Politieke Partijen den Staten – y screening propio di candidatonan, ambos ancra den e statutonan di e partido, por resulta di bira gamechangers tematico den e aña cu ta bin. Ken ta haya di ken. Ken di berdad ta bay tin man limpi den e campaña aki? Nan lo por pone presion riba e partidonan grandi, pero di otro banda nan lo por backfire tambe riba POR si nan no logra di follow through riba nan principionan of si financiadornan keda sin acudi pasobra nan no kier pa nan contribucion wordo documenta. Fuera di esey tambe tin e posicion di Oduber – cu debe parti di su fama politico tambe na su moda agresivo di bula riba su contricantenan, sea ta politiconan, hendenan cu ta skirbi remitido of Raad van Advies – cu kier kibra cu e politica bieu di atakenan personal. Un cos ta bay ta sigur, e lo no ta bay ta facil pa mantene e postura ey. Ya di biaha caba surogadonan di AVP a post diferente cos haciendo mofa di e move di Andin pa join y hecho cu no tur stul den sala di Cas di Cultura tabata yena. Pero tambe e propio godfather di MEP mes, Nel Oduber a tira poco puy, papiando di ‘un forsa nobo cu zapato bieu, bachi bieu yen di dinosauronan camufla den otro partido politico’, y yamando mepistanan pa no cay den tentacion. Papiando cu Otmar Oduber poco despues di e evento (hunto cu su siguidornan e tabata yuda ruim op), mi a ripara su intencion di no cay den e wega di tira palabra. Toch, y mi ta menciona esaki pasobra no ta e so a contami, e no a faya di menciona entre otro casonan di persecusion politico cu ta tumando luga aworaki den Bestuurskantoor contra su hendenan. Pero fuera di esey mi a ripara cu Oduber su postura ta menos tenso, mas habri cu tempo e tabata minister, specialmente durante e ultimo aña. E no ta bay facil p’e. No solamente partidonan politico, periodista y agencia di publicidad lo kier wak e cay, pero tambe por ehempel Ahata y Eduardo de Veer a bira enemigonan potente. Pero esaki ta su momento y ta parse cu e tin hopi gana pa bay all out.

 

Mas laat, poco 100 meter mas leu riba Boulevard, prome minister Mike Eman a presenta promove e apertura di campaña di AVP cu ta bay tuma luga otro weekend. Tambe a presenta e resucitacion di e hala hubenil di e partido, HAC (ironicamente e mesun organisacion na unda Otmar Oduber a start su trayectoria den partido). Tempo mi tabata bay scol, HAC den boca di pueblo tabata nifica H***mento A Caba/Cuminsa (depende ken bo puntra) y nan headquarters tabata un shack di palo patras di Elmar den Adriaan Laclé Boulevard. Eynan tabata unda boshi hoben tabata bay hang out ora di spijbel, incluyendo ami di bes en cuando. Nada di politica tabata tuma lugar eynan si. Anyway, Izaline Callister cu lo headline e programa a show up na e presentacion, mescos cu ministernan Hooyboer-Winklaar y De Meza. AVP obviamente ta scohe pa e formula cu nan sa cu ta traha pa nan; un evento flashy den aire liber cu hopi musica, cerbes y partimento di sticker y t-shirt. Poco rato despues Minpres a sigui su caminda pa Paradera pa desvela Caya Juancito Marciano ‘Chay’ Laclé, hunto cu entre otro Michella Steenvoorde-Laclé, cu aworaki ta figura riba lista di POR. Ban spera cu e asunto no tabata mucho awkward pa ambos.

 

Wel shonnan, 2017 ni a cuminsa mes y ya caba cos ta hot. Mas laat awe Holmo Henriquez ta anuncia su partido nobo, MAS.

Top Ads
Top Ads
Top Ads

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.