CMB BD

EXCLUSIVO: Relato detaya di aspectonan ambiental di contractonan entre Aruba y Citgo

EXCLUSIVO: Relato detaya di aspectonan ambiental di contractonan entre Aruba y Citgo
Top Ads
Top Ads
Top Ads

Via un fuente no politico, Den Cayente a haya inzage den e Definitive Participation Agreement entre Land Aruba, Citgo Aruba Refining, Citgo Aruba Terminal en Citgo Aruba Holding LLC, data riba 10 di juni 2016, pa loke ta operacion di e refineria y e terminal. Tambe a mira entre otro e Refinery Lease Agreement, e Terminal Lease Agreement y tambe e garantianan. 

 

Pa loke ta supuesto informacion confidencial di compania, mi a purba di tene mi mes lo mas posibel na topiconan di interes general, manera accountability y medio-ambiente. Den e articulo aki no ta menciona cantidad di assets of capital di Citgo. Hecho ta cu pa lo mas leu cu mi por a wak den e cantidad di paginanan den dje, e Agreement mes no ta haci mencion di assets of capital di e compania.  Riba dje, ningun pagina cu mi a mira tin un stempel di e palabranan ‘secret’ of ‘confidential’. Mencion di confidencialidad – pa loke mi a wak – ta solamente den contexto di intercambio di informacion entre gobierno di Aruba, Refineria di Aruba y Citgo Aruba Refinery. Den otro palabra, mi a haci effort pa percura pa no publica supuesto informacion confidencial di Citgo. Aki no tin scan di e documento mes y no ta bay tin tampoco.

 

Tur esey bisa, Den Cayente a haya chens pa wak poco cos un rato. Mester indica bon cla cu intencion di e relato aki – a pesar cu mi opinion riba e topico ta conoci – no ta pa perjudica ningun gobierno, partido of compania, pero pa duna informacion na pueblo y habri e debate publico riba e cuestion. Solamente cu informacion y contexto riba mesa, pueblo por forma un opinion cu nuance y dicidi pa su mes si berdad e deal aki ta beneficioso pa Aruba a largo plazo. Ta hopi di lamenta cu no tin suficiente tempo pa relata riba tur aspecto, manera esun laboral y naturalmente e garantianan cu ambos partido ta duna otro, pero a lo menos esaki por saca aworaki. Mirando con grandi e documento ta y e poco tempo cu resta prome cu e tratamento mayan (y hecho cu Raad van Advies a duna di su banda extensamente caba), ban focus riba aspectonan di medio-ambiente:

 

Pa cuminsa, gobierno y instancianan gubernamental ta para responsabel pa loke ta wordo qualifica como ‘pre-existing environmental conditions’. Esaki ta e verzamelnaam cu partidonan a duna pa tur daño na medio ambiente cu a wordo haci pa operadornan anterior. “The Government and the other Government Parties will be jointly and severally liable for and shall indemnify, defend and hold harmless the Investor Parties and their respective Affilliates for any and all Third Party Liabilities arising or resulting from or relating to any Pre-Existing Environmental Conditions […] and the Investor and its Affilliates shall not, now or in the future, be liable for any Pre-Existing Environmental Conditions, as provided further in the Implementing Agreements.” Cualkier daño of perjuicio na cualkier persona of instancia causa pa e condicionnan aki ta pa cuenta di Aruba. Ta conoci cu durante e proximo dos añanan na unda lo bay prepara e facilidadnan pa bay opera como upgrader, Citgo lo bay conduci un environmental survey di full e area. Akinan lo bay establece kico e ‘pre-existing environmental conditions’ lo bay ta. Con cu bay bin lo ta bon pa publica kico exactamente e resultadonan di e survey aki lo ta pa asina, den caso di un incidente na unda tin daño ambiental, lo no por categoriza daño nobo como pre-existente.

Gastonan di limpieza di e asina yama Housekeeping (cual ta wordo considera como pre-existing environmental condition) ta bay pa cuenta di gobierno y Refineria di Aruba.

 

Standards

Den e agreement ta wordo stipula cu Aruba y Citgo lo acorda riba un set di Environmental, Health & Safety Standards, basa riba ‘good practices’ di e industria petrolero internacional y guidelines formula pa World Bank, y consistente cu legislacion vigente. Esaki by the way tambe ta conta pa condicionnan di siguridad laboral na e refineria. Hecho ta cu Aruba no tin ley di medio-ambiente, ni ARBO-wet. E standards aki, unabes cu nan wordo acorda, ta y lo keda e unico criterionan pa medio-ambiente, salubridad y siguridad aplicabel pa henter e operacion. E pregunta ta bira e ora, si acaso nos haya ley di medio-ambiente of un ARBO-wet, te con leu esakinan lo bay ta aplicabel. Ta uza e cualificacion ‘consistente cu legislacion’, pero tumando cuenta si cu estado di e facilidad na momento cu ela wordo entrega na Citgo. E mesun leynan (no-existente na momento aki, pero toch…) cu lo aplica pa un ciudadano of un compania si por ehempel ta dump of sende candela den mondi, lo aplica directamente tambe pa e upgrader?

 

Landfill

E agreement ta indica cu lo bay construi un landfill pa uzo exclusivo di Citgo. Akinan lo deshaci di ‘solid waste’ genera pa e instalacionnan y Marine Operations. Citgo ta diseña, financia y construi e landfill aki. E operacion lo bay ta segun e Environmental, Health & Safety Standards y lo bay tuma cuenta cu condicionnan geologico y geohydrologico di e sitio na unda lo bay construi. Kico si y particularmente kico lo no mag bay den – fuera di materialnan considera como ‘hazardous’, cual no ta defini – e landfill aki no ta conoci ainda pero lo bay wordo stipula den un Waste Management Plan cu lo wordo entrega na gobierno pa review.

 

Pilot project

Pa loke ta e asina yama ‘carbon capture project’ uzando micro algae, ta trata aki di un pilot project di Refineria Di Aruba y Citgo Aruba Refinery conhuntamente. CAR ta hinca un maximo di 5 miyon dollar den esaki.

 

Sinembargo, den e agreement tambe tin acuerdonan cu ta mara Citgo na cierto condicionnan.

 

Capital Environmental Projects

Na comienso di e operacion, Citgo lo wordo teni na e mesun standards y expectativanan di conducta riba tereno di medio-ambiente cu Coastal y Valero prome cu nan. Despues sinembargo, Citgo lo mester bay commit su mes na reduci e impacto di e operacion riba medio-ambiente. Citgo lo mester raporta reduccionnan aki anualmente na gobierno di Aruba. Tin cuater asina yama capital environmental projects. E landfill ta wordo considera como un di nan. Tambe lo bay traha un Waste Water Treatment Plant, drecha e riool y saca e zeta bieu for di e awa den e asina yama Lago Wells pa evita cu e lo keda leak den laman.

 

Acid Gas Flaring

Notabel ta inclusion di un articulo na unda ta commit Citgo pa reduci substancialmente e asina yama acid gas flaring. Gas flaring, pues kimamento di gas produci den e proceso di refina of den caso aki upgrading, no solamente ta saca hopi greenhouse gas pero ta hopi malo tambe pa salud di hende, dependiendo di e composicion di e gas cu ta wordo kima. Den e agreement ta wordo stipula cu den caso cu mester kima gas, Citgo mester notifica Directie natuur & Milieu y DTI at least cuater ora di antemano. Citgo mester tuma pasonan razonabel, tumando condicionnan meteorologolico manera biento na cuenta, pa bisiñanan no wordo afecta negativamente. Tin un limite di 25 ‘long tons’ di acid gas cu Citgo mag di kima pa dia, pa no mas cu 30 dia consecutivo si acaso tin un shutdown di un of mas Sulfur Recovery Unit pa normalisa situacion di acid gas. Si e shutdown dura mas cu 7 dia, Citgo tin cu notifica DNM y DTI ki dia e SRU’s ta supposed di ta bek online. Citgo mester tene un record di e oranan cu a haci acid gas flares. Record aki mester wordo manteni pa 5 aña y keda accesibel pa gobierno.

 

Desmantelacion

Unabes cu e lease termina, Citgo Aruba Refinery por entrega e refineria bek of desmantele. Esaki segun escogencia di Refineria di Aruba. Si RDA no haci su escogencia conoci prome cu un aña despues di e expiracion di e lease, Citgo lo wordo exonera di su obligacion pa desmantela.

 

Posicion economico ta keda intacto

Na final di dia, Aruba ta garantisa stabilidad di e Terms & Conditions di e Agreement y e condicionnan fiscal y contractual. Si leynan cambia, ta adapta e Agreement pa percura cu e posicion economico di e inversionista keda intacto.

Top Ads
Top Ads
Top Ads

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.