Draagvlak 3: Ta con Anto?

Draagvlak 3: Ta con Anto?
Top Ads
Top Ads

Den e di tres parti di su serie ‘Draagvlak’, Jonathan Mejia aka Tatitan ta laga e carni pa ultimo pa loke ta Aruba su deficit, Caft y nos relacion cu Hulanda.

 

Draagvlak Politico Hulandes a caba na Juni pero Reino ta sigui y cu Aruba den dje, right? OK, pero ta con anto? Sun Tzu, e famoso militar y filosofo Chino, a yega di bisa cu den tempo di paz bo ta prepara pa guerra y den temponan di guerra bo ta prepara pa paz. E implicacion eynan ta cu tur loke nos por observa te awor te e preparacionnan, di tur dos banda, pa e conflicto cu ta biniendo. Pero con e conflicto mes lo wordo resolve ta algo cu nos lo por mira ora nos ta den dje. Sinembargo, e preparacionnan por indica e forma cu e resolucion lo tuma y mi kier provecha e oportunidad aki pa mi splica con mi ta mira esey lo sinta den otro.

 

Pero prome mi kier enfatiza cu loke ta biniendo, den mi opinion, ta imminente y inevitable. Si Reino ta di haci algo, e lo hasie e anja’ki pasobra un eventual intervencion na 2017 lo por wordo mira como un intento di influencia Aruba su eleccion y 2018 ta muchu laat. Banda di esey, mi kier drecha un cos den e timing di mi narrativa. Na final di e prome parti m’a bisa cu e votacion pa miembrecia di Conseho di Seguridad di UN lo ta na cuminzamento di luna pasa, pero ta resulta cu eleccion lo tuma lugar dia 28 di Juni 2016. Pues Reino lo tin di Juli te December pa yega na algo. Lo ta interesante pa wak con e debacle sin fin rond di e ‘geschillenregeling’ lo fit den e ‘timeframe’ aki.

 

Bayendo den dje awor, nos por observa cu pa casualidad net e dia prome cu Den Cayente a publica e di dos parti di mi narrativa, e portal Noticiacla.com a publica Minister Plasterk su respuesta na e preguntanan di Parlamentario Hulandes Bosman tocante e diferencia bestial cu tin entre e deficitnan financiero 2015 segun gobierno y Banco Central. Di acuerdo cu e mandatario Hulandes e diferencia ta sinta den e hecho cu e resultado segun gobierno (98 miyon florin) ta midi ‘op transactiebasis’, versus CBA su style di midi ‘op kasbasis’ (201,7 miyon). Den e diferencia tambe lo tin placanan cu lo mester ta aloca pa Fondo di Desaroyo Aruba (FDA) hinca aden, mescos cu dividendonan ricibi fo’i Utilities y Setar. Plasterk a hasi manera esaki no ta un ‘big deal’ pasobra e diferencia ta un “terugkerend verschijnsel”, pero si ta wordo tuma na cuenta cu FDA tabatin un buraco di 23 miyon na 2014 y 2015 (pasobra gobierno a keda hala su dotacion na e fondo pa anjanan siguiente), y cu Banco Central su deficit ta bira 262 miyon ora bo desconta e kwijtschelding di e debe serca SVB (cos cu CAft ta hasi den nan analysis, yamando e kwijtschelding aki un “kosmetische boeking”), e ta dificil pa kere cu benta di edificio hunto cu e dividendonan di companianan estatal lo por splica e discrepancia. Mas bien, Plasterk su respuesta ta parce di ta un ‘teaser’ pa e conflicto. Den tur caso, e resultado final pa 2015 ta algo cu lo sali afo te na September den cuenta anual, dus tempo lo mustra.

 

Querido lector, por ta bo lo ta puntrando bo mes: “Pero Tatitan, dicon bo ta papia di conflicto imminente si professor Bakker a sali ni un par di siman pasa den medionan bisando cu Presupuesto 2016 ta bayendo den bon rumbo, sin conta cu e re-activacion di refineria? Ta dicon Reino lo start un bululu anto?” Wel, lagami responde e prome pregunta c’un otro pregunta: si en berdad CAft ta asina optimista, dicon nan a para sinta warda pa e deal cu CITGO, y no simplemente aproba e Presupuesto den prome instancia? Den serio, e unico cos cu ta scapa Bakker su declaracion siman pasa di contradeci tur cos cu e college a scirbi te awor tocante Presupuesto, ta e logica cu e professor a pega tras di e comentario. Den caso tal cu e riesgo(nan) senjala pone e realisacion di e meta fiscal den peliger, medidanan lo wordo tuma. Atrobe, tempo lo mustra.

 

Anto lagami tambe responde e di dos pregunta c’un otro pregunta: dicon ta juist Reino lo mester ta esun cu ta start e bululu? Manera m’a implica aki riba, y apesar di Bakker su palabranan bunita, e Presupuesto 2016 ainda no ta ‘CAft approved’ y como tal gobierno ainda no por conta cu ‘nos’ organo fical su consentimiento pa subi mercado financiero pa fia placa, si e no ta pa re-financia debe bieuw. Corda bon: “When you got no Fiscal Space, somethings gotta give, always, no exceptions, no free lunches”. Mi fans sa kiko mi kiermeen (oh yes, I got fans ;)). Tardi of trempan cos lo bira krap pasobra gobierno por bay fia placa pa paga debenan cu ta caduca e anja’ki, pero no pa paga otro obligacionnan manera vakantie-uitkering y salarionan. Por ta e cobra-clutch financiero aki ta e motibo dicon hefe di CAft tabata asina sigur den su declaracion maske ainda Presupuesto no ta ‘toetsbaar’ segun e ultimo feedback duna na Juni. Placa di CITGO ta drenta ‘on time’ of lo tin ‘ahuste’. Something’s gotta give.

 

Hmm, cu nos organo fiscal bisando pa kiko si of no mag di fia placa y ademas sugeriendo un limite riba e proyectonan PPP (un limite cu por cierto ta wordo expresa na un modo sospechosamente pareci na e ‘rentelastnorm’ di Corsow su Rft), cos ta mustra cu Reino ta hanjando e control riba Aruba su finanzas cu e lo a purba di hanja anja pasa, pero di un manera ‘verkapt’ (lesa: scondi). Esey si Reino cuminza follow-up den su control. Mi kiermeen di: no mescos cu na Januari ora Reino a wordo informa door di CAft cu gobierno a fia 11 miyon florin explicitamente sin e aprobacion di e college, anto hasi absolutamente nada 6 luna largo. Plasterk no a ni hasi un declaracion. Hmm, pero laga Corsow hasi un cos asina…

 

Mi sa kiko bo ta pensando: “Warda un rato Tatitan, con bo kiermeen cu Bermudez a fia 11 miyon sin permiso di Reino? Di unda b’a saca e co’ey?” Ah, e pid’ey;  m’a bisabo den ‘part one’ cu mi ta un guy cu ta gusta laga e carni pa ultimo, sigui lesa…

Wel, e suppletoire begroting 2015 tabatin e transaccion ey den dje y e dia despues cu Gobernador a firma pa e cambio di presupuesto aki, MinFin a core fia e placa, esta dia 30 di December. Minister Bermudez a fia e placa den full conciencia cu ‘nos’ organo fiscal a prohibi e fianza (of miho bisa, CAft a laga sa cu nan no lo aprobele) den un carta na November. Despues na Januari 2016, e thema a wordo trata durante e college su bishita, na unda MinFin su standpunt tabata –aparentemente- su conviccion cu e meta fiscal lo wordo alcanza (pa medio di VAS, mi ta kere). CAft na su turno, no a keda convenci y friamente a hasi notificacion na Minister Plasterk dia 28 di Januari 2016, pero ainda nada. Tur cos den e alinea’ki bo ta hanjele den un documento yama “20160128 Advies obv art 11.2 LAft op vastgestelde BW 2015 Aruba”, e prome alinea den pagina tres. Anto e bofta mes bo ta sintiele ora coba den ‘timeline’ y hanja Noticiacla.com su articulo fecha 3 di November cu e titulo: “Bermudez: Gobierno sigur tin suficiente placa pa fin di aña 2015”. Ta pakiko b’a fia 11 miyon anto?

 

E cos mas stranjo den full e ‘timeline’ stranjo aki ta cu, aparte di e biaha cu Parlamentaria Ruiz-Maduro a bati alarma riba e irregularidad aki, niun hende a hasi buya. Mi ta compronde di banda di fraccion berde y e aliadonan den mediasphere, pero no di banda di CAft, Plasterk, Bosman, Banco Central of Raad van Advies. Y especialmente no di banda di Noticiacla y demas prensa independiente, incluyendo mi mes. E news aki ta ‘juicy’. WTF? Con mi por a faya di observa e cos’ki? Ta manera si Xiomara so tabata sa di e college su notificacion na Plasterk. Wak, mi no tin prueba duro di lo siguiente (ni mi lo hanjele), pero na mi parecer no ta tur ora CAft ta pone su feedback riba su website na e modo prescirbi den nan bestuursreglement. E feedback di e concepto di e suppletoire begroting y e di tres kwartaalrapport tampoco a sali na ora, kiermeen cu esaki no ta e prome biaha. Djis pa’mi dunabo un idea di con diep e Draagvlak echt ta bay.

 

Draagvlak, mi ta fadando di e palabra ey. Si ta mi apoyo mes bo kier, bo mester ta straight cu mi. Sin ‘sugarcoat’ pasobra si Pueblo tin cu bay tira sucu riba tur loke nos mester bay slik, anto nos ta bay muri di diabetes ni cuanto hopi nos cana ariba-bou e Linear Park. Y si ta un ‘korreltje zout’ envez di sucu, e ora lo ta bo presion loke ta matabo.  CAft ta bisando “from Day One”cu pasonan structural necesario pa berdaderamente yega na finanzas balansa falta pa wordo tuma, esey ta mustra cu “the real choices” ainda falta pa wordo poni nos dilanti door di nos mesun dirigentenan. Anto mirando nan narrativa, e no ta mustra cu esey ta parti di e plan. Akinan ta unda presion di Reino por yuda, den mi opinion. Con cu e bay-bin, e ta obvio cu Reino no lo crash su Titanic riba nos manera anja pasa, mas bien nan a ripara cu Aruba en berdad ta un ijsberg na merced di laman y e ta mas facil pa marele di tur banda posibel pa despues lastrele den e  direccion desea. Djis check e quote aki di Fitch unda nan ta senjala un factor di riesgo cu lo por afecta rating: “Deterioration in the institutional relationship between Aruba and the Netherlands”.  Pues mi no ta kere cu lo tin muchu bululu (lo ta mas tanto pa show). Pero OK, nos ta na Juli. Ban wak awor ta con anto.

Top Ads
Top Ads

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.