Miraflores

Miraflores
Top Ads
Top Ads

Hecho cu e firmanan a wordo poni na Miraflores y no na Texas ta bisa mas cu suficiente. Mas ainda, hecho cu embahador di Hulanda tabata den sala cu un sonrisa di orea pa orea pa presencia e acto tambe ta bisa hopi. Y e ta spantami. Mi no por kere cu nan no tin niun bista riba e riesgonan cu Reino ta tumando cu nan bisiña mas grandi. Kico mester tabata nan consideracion pa bay di acuerdo cu lazonan economico cu dictadura di un pais completamente inestable? Pero loke mas a impactami tabata un momento cortico – un par di seconde no mas – di e transmision di e acto protocolario. Tabata momento cu presidente di Venezuela Nicolas Maduro tabata dunando su discurso y papianndo riba con e imperialistanan ta asina hambra pa e recursonan natural di Venezuela. Palabranan cu normalmente bo ta tende di hendenan cu ta gusta conspiracy theories y ta kere den illuminati y cu normalmente bo ta ignora pasobra eigenlijk no por echt discuti cu nan, corda razona. Pero aki ta trata di presidente di un pais. Of miho bisa, un dictador cu mas poder den su comunidad cu por ta bon pa cualkier persona tin. E shot tabata di nos prome minister mirando y dunando atencion na e palabranan di e homber aki. Y loke ami a mira den cara di Mike Eman tabata un incomfortabilidad y kizas hasta un panico chikito. Bo por casi imagina con e ta pensa: “Ki mishi mi akinan, sinta banda di e guy aki. Na cas tin hende cu a yama mi loco pasobra mi a scohe pa bay den un welga di hamber. Pero akinan, un par di centimeter band’i mi anto casi teniendo mi man, ta un loco di berdad. Di remate. Un guy cu pa e mesun placa lo ordena pa tira nos tur akinan sera den kelder di e palacio mahos aki si ami of un di nos wak e robez. Anto mi a caba di firma futuro di mi pais cune.” Na un momento asina mi por imagina mi cu un persona lo juist bringa e ansha y pusha bay allout, dor di por ehempel ofrece out of the blue pa media entre PSUV y oposicion. Mi por imagina mi e alivio ora cu henter e delegacion Arubiano tabata den avion caminda bek pa Aruba. Leu for di e sala mahos ey den e palacio presidencial pesta cu soldadnan arma, bou tur e lusnan cayente ey di camera. “Ban cas bek. Ban San Nicolas. Eynan nos coordinadornan ta warda nos pa festeha. M’a tende cu tin bolo. Net bon paso mi ta kere cu mi sucu ta un tiki abou di tanto nervio.”

For di parti di gobierno, e deal aki claramente tabatin su intencion logico su tras, esey hasta e persona mas anti-refineria mester por compronde. Pero no lubida cu pa cuminsa a considera pa habri e refineria bek. Esey por wel di ta muestra cu e caminda cu a scohe na comienso pa yega na un balanced budget no tabata dunando suficiente fruto. At least no lihe suficiente, pues prome cu 2018, of mihor ainda; eleccion. Anyway, otro regla di bida ta cu ora bo sera e deal, bo tin cu bay media anto sell, sell, sell. E proyeccion optimista di esnan mas serca di e pluche ta premira entre otro 5% crecemento extra pa aña, 2000 pa 3000 trabou y un minimo di 100 miyon florin extra den staatskas pa aña. Asina por alcansa metanan financiero y te hasta lo por yega na financiamento mas barata via Hulanda locual lo spaar un extra 120 miyon extra. Un decision pragmatico cu bista riba termino largo. Y, un biaha mas, e regla ta cu pragmatismo semper mester gana di idealismo. Na Caribisch Netwerk Mike Eman a responde riba e pregunta si un deal cu un pais cu ta viola derechonan humano ta algon pa haci dor di bisa cu di berdad e lo bay den historia como un lider irresponsabel si e laga un chens pa hisa e GDP bek cu 15 porciento bay a base di principio. Principio por cierto cu niun otro pais a tuma te ainda. Aruba so lo para duro pa derechonan humano, mientras cu Hulanda mes ta keda bende arma y Merca ta keda economicamente presente na Venezuela mientras cu e pais ta cayendo den chaos. Pragmatismo. Nunca laga idealismo para den caminda di prosperidad. I get that. Pero e riesgo cu Aruba ta tumando ta uno cu aparentemente – of mihor bisa strañamente y apesar di tur e pragmatismo desplega – no kier considera.

Citgo berdad ta un compania Mericano pero e petroleo cu ta bay saca ta hinca diep den un pais cu ta na borde di colapso. Na e momento cu hariña pasa awa, e chens lo bira grandi cu lo no por saca e petroleo for di Orinoco mes. Corda pensa riba traha un tubo di gas. Sorry, pero nos ta den un guera civil. Ora nos ta cla nos ta atende cu boso atrobe. Yama nos bek aki un par di aña.

Poco siman pasa tabatin un reunion aki na Aruba na unda a discuti cu un experto Venezolano e situacion actual serca nos bisiña. Basicamente ta premira un situacion na unda cu e regimen di PSUV, a base di convocatorio di estadonan di ‘alarma’, despues ’emergencia’ y finalmente ‘comocion’, lo por bay pospone e referendum revocatorio cu oposicion kier yama contra nan. Esey lo por resulta den violencia, chaos y un paro di cualkier actividad normal economico, manera por ehempel e plannan pa cual a firma na Miraflores. Anto pa un tempo largo. Hende ta papia di añanan prome cu situacion na Venezuela normalisa den cualkier scenario.

Of e por ta mas simpel. Pa e mesun placa Nicolas Maduro por djis lanta un mainta cu beis y declara cu Aruba ta pesta cu anti-revolucionarionan y cu e deal manera e ta no ta valido mas. Lo no ta prome ni ultimo biaha cu e cabayero aki su chip kima, dus ban tene cuenta cu esey tambe. Francamente e idea riba su mes caba cu su influencia ta hopi mas serca awo tin mi preocupa. Pa serca cu Aruba y Venezuela ta y con estrecho e lasonan, semper tabatin un cierto distancia defini entre nos cu nan. Por bisa cu juist e distancia economico, social y politico ey tabata un di e ingredientenan intangibel di Aruba su prosperidad compara cu otro paisnan den region durante e ultimo siglo. Cos ta diferente awo y ya, ata nos akinan.

Top Ads
Top Ads

About The Author

Related posts

1 Comment

  1. Pingback: Oliedeal tussen ‘groen’ Aruba en crisisland Venezuela roept vraagtekens op | Lukas Bouwman

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.