CMB BD

OM: ‘Danies no mester comete hechonan castigabel pa haya nos atencion’

OM: ‘Danies no mester comete hechonan castigabel pa haya nos atencion’
Top Ads
Top Ads
Top Ads

Despues cu varios caminda atrobe a haya bishita di Reginald Danies cu su spuitbus, tin un discusion grandi andando awo riba si e actonan aki di vandalismo ta efectivo ainda. Danies y esnan rond di dje ta bisa cu ta su derecho pa expresa su mes y cu autoridadnan ta mustra di no tin niun interes den detene su persona. Segun Danies, autoridadnan lo a purba di laga e caso muri ya cu Juancho Tromp – e persona cu a wordo acusa y a wordo deteni despues di un aña pa e abuso di yiunan di Danies -, y e agente policial cu a tuma e keho di Danies lo tin proteccion politico. Danies a declara na Den Cayente durante e protesta di 15 di april dilanti Bestuurskantoor cu e ta convenci cu pa e motibo ey e lo no wordo deteni ni kico cu e haci. Te ora nan detene, Danies ta sigui spuit ‘Aruba Pro Pedofiel’ tur caminda, ultimamente riba muraya di Marinierskazerne na Savaneta y riba muraya di warda di polis na San Nicolas.

Mientrastanto Juancho Tromp a haya extension di su detencion cu 60 dia awetardi. Segun Milly Ras, cu ultimamente ta actua como vocero di Danies, Tromp su detencion lo ta pa su mesun proteccion ya cu lo tin cantidad di menasa contra su persona. Autoridadnan lo a perde pruebanan contra Tromp segun Ras, pues lo no tabatin motibo pa detene Tromp. Ras ta enfatiza tambe cu Danies kier wordo deteni pa un minimo tres dia pa e wordo atendi pa un fiscal Hulandes y cu autoridadnan lo no kier esey. Segun Ras te ainda niun instancia a atende cu yiunan di Danies tampoco.

Den Cayente a tuma contacto cu vocero di Ministerio Publico Ann Angela pa puntra si berdad no tin niun interes den detene Danies pa actonan di vandalismo y, si berdad ta asina, anto pakico. Segun Angela tin dos cos ta core banda di otro pa loke ta situacion di Danies. Referiendo na e actonan di vandalismo cu a sigui den dianan cu a pasa despues di e manifestacion di 27 di April ultimo, Angela ta bisa cu Danies na un banda ta cometiendo actonan castigabel, riba cual OM lo tin cu reacciona. Pa loke ta actonan previo, ya caba tabatin reaccion di parti di Husticia, segun Angela. “Recherche a papia dos biaha caba cu meneer. El a sigui obviamente.”

Si Danies kere di lo por papia cu fiscal tocante e investigacion di JZP si acaso e wordo deteni pa vandalismo, e ta ekivoca, asina Angela ta splica. “Si e wordo deteni mes, lo ta pa e actonan castigabel cu e ta cometiendo y ta di esey lo papia. E fiscal lo ta esun di piket y no esun cu lo por informe tocante e caso.” Angela ta bisa tambe cu e fiscal cu lo atende cu Danies si e wordo deteni no automaticamente lo ta un Hulandes, aunke cu tin cuater Hulandes y dos Arubiano riba piket. “E ta depende ken tin warda”, segun Angela. Finalmente Angela ta splica cu Danies como tata di victimanan den un caso di abuso sexual, tin tur derecho y oportunidad pa papia cu fiscal di JZP tocante progreso di e investigacion, si e ta interesa. “Y e ta bonbini pa haci un afspraak pesey. Ta un cuestion di yama e publieksvoorlichter na 5214135 of di pasa na balie.” Vocero di OM ta laga sa cu fiscal di JZP cu ta atende e caso pa casualidad ta Hulandes. “Si e kier papia cu fiscal, e por papia cu fiscal. Mescos cu otro hende. E no mester comete hechonan castigabel pa haya nos atencion. E tin cu gewoon puntra pa un afspraak.”

Den Cayente a purba haya contacto cu Reginald Danies pa un reaccion pero no a haya esaki ainda.

Top Ads
Top Ads
Top Ads

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.