CMB BD

Draagvlak 2: Building up the file

Draagvlak 2: Building up the file
Top Ads
Top Ads
Top Ads

Jonathan Mejia ta bek cu e sequel riba su columna ‘Draagvlak’. Prepara pa juni, shonnan…

E motibo principal pa mi radiostilte e ultimo lunanan ta cu mi tabata kier wak si algo tabata pasa cu lo por convencemi cu cosnan no ta desaroyando segun mi narrativa manera m’a cuminza conte den mi articulo anterior. Pero cu Presupuesto 2016 ratifica door di Staten na Februari y alavez medio estatal Hulandes NOS (ojo!) usando lenguaje manera: “..nadat het college van toezicht de begroting van Aruba heeft afgekeurd..”, en realidad mi no tin cu warda pa “nos” organo fiscal sali duna su feedback (cos cu nan a hasi luna pasa) pa mi por conclui cu nos ta den curso di colision cu Reino atrobe, cu of sin e re-activacion di refineria.

Dus ya caba na Februari por a wordo observa c’un narrativa hustificando un posibel intervencion (por si cos en berdad tin cu yega asina leu) a wordo estableci na tera friew y e problema cu esey ta cu gobierno no tin aliado den mediasphere Hulandes pa e por bringa su caso ayanan. Lo unico cu gabinete berde por hasi ta pusha su argumentacion serca Pueblo akinan, pa ora bululu start na Juni, despues cu nos wak si Gabinete Rutte a hanja su kier den Asamblea di Nacionnan Uni of no, gobierno por hasi manera nan no tin culpa den tur esaki, cu Hulanda ta trapando riba Aruba su autonomia atrobe, y asina crea un situacion di ‘bo ta cu Aruba of bo ta cu nan’.

Pero ta juist pa evita un wega polarizante di ‘nos’ contra ‘nan’ ta cu nos mester a accepta CAft como scheidsrechter, toch? Reino ta tuma accion semper den marco di LAft y unicamente unda ‘nos’ organo fiscal ta indica cu e ta necesario. Anto cu CAft bisando cu e 4e kwartaalrapport ta mustra cu Aruba a logra e meta fiscal pa 2015, bo lo pensa cu cos no por ta dje malo ey, apesar di tur e ‘kanttekeningen’. Y cu e college ta dispuesto pa “kijk de kat uit de boom” te na despues di Mei (manera nan feedback riba Presupuesto ratifica ta bisa cu nan lo hasi) mester por ta un confirmacion di esey, right? Right?

Wrong. Ta un cos di spera cu CAft lo yuda mantene e ilusion presenta den 4e kwartaalrapport, si ta wordo tuma na cuenta cu tur dos agencia mericano di rating, esta Fitch y S&P, a laga sa anja pasa cu nan “outlook” riba e debe soberano di Aruba e anja’ki (y esunnan venidero) lo depende entre otro riba e isla su abilidad di cumpli cu su metanan fiscal. Si Bakker & Friends lo a baha pisa riba resultadonan presenta door di gobierno, e lo tabatin como consequencia cu e ‘outlook’ (of e rating di e debe mes, cu lo ta mas erg ainda) ta cambia negativamente y esey lo nifica cu Aruba lo mester deal c’un nivel di interes mas halto. Djis 1% lo nifica un 5 miyon florin extra na interes pa e anja’ki y e lo keda crece cu tempo masha liher mes. Fo’i e perspectiva aki, e ta un cos logisch y hopi prudente cu ‘nos’ organo fiscal lo a bisa cu nan lo warda te na despues di Mei (despues cu hendenan di Fitch y S&P hasi nan bishita) prome cu nan bay guerra.

Un guerra cu, por lo pronto, ta mas friew c’un cerbes di rumshop riba un diabierna atardi; tur cos riba un chill. E kwartaalrapportnan (tur cuater) semper a mustra cu gobierno a mantene su patroon di comportamiento di temponan prome cu LAft, kiermeen cu CAft nunca tabatin motibo pa pensa cu e resultadonan di 2015 no lo sigui e mesun patroon di anjanan anterior. Na 2014, por ehempel, e deficit tabata di bira 4.7% di BBP segun e plan, despues a cambiele pa 4.9% na December y na ultimo e resultado a cay rond di 5.8% (sin conta cu e deal di APFA). Dus pa ‘nos’ organo fiscal e tabata un cuestion di djis pone bon cla den su comentario inicial cu gobierno ta cayendo atras y cu e ta dificil pa Aruba logra e meta fiscal, pa despues nan bisa cu tur cos ta mustra ‘tentativamente’ OK den 4e kwartaalrapport sabiendo masha bon cu e gabinete aki toch lo bay ‘over the limit’. Na ultimo, nan ta djis dal e style di: ‘We told you so’, anto dal un slok di e cerbes.

Mi kiermeen di: CAft lo a wak e cifranan devastador di Banco Central (hopi) prome cu nan a wordo publica, toch? OK, laga nos leu mind p’awor cu CBA su ‘Economic Forecast Monitor’ ta confirma cu anja pasa Aruba a bay door di un ‘mild recession’, dus casi no tabatin crecemento economico (0.1% den termino real, apesar di tur e Proyectonan PPP). E documento aki ta basa riba un otro yama ‘Statistical Tables Q4 2015: Government Sector’, publica na 14 Maart, cu esencialmente ta confirma cu gobierno no a cambia su modo di opera. E bofta mes bo ta sintie ora bo ripara cu e deficit financiero den CBA su rapport, na valor di 201.7 miyon florin (versus 98 miyon segun gobierno), tin e bendito cancelacion di gobierno su debe serca SVB (60.5 miyon) hinca aden caba! Descontando e kwijtschelding aki e deficit segun Banco Central ta cay mas halto ainda! OMG…

Pues gobierno ta sigui den su rumbo mientras CAft ta sigui build up e file riba dje. Cu a purba (sin exito) di tapa e buraco anja pasa cu transaccionnan incidental ta nifica cu gobierno a consumi e tiki ‘Fiscal Space’ cu por tabatin ainda y na final a sirbi unicamente pa yuda onderbouw e argumento central cu ‘nos’ organo fiscal ta hibando ‘from Day One’, esta cu gobierno no ta tumando pasonan structural necesario pa berdaderamente por yega na finanzas balansa. Fo’i e perspectiva aki, e manera con e ‘Fiscal Space’ genera door di re-activacion di refineria lo wordo consumi segun Presupuesto no ta hasi nada mas cu confirma cu e patroon di tur anja lo wordo ripiti atrobe.

Na mi parecer, esaki ta e conclusion cu lo wordo saca na Den Haag. 2014 tabata ‘strike one’, 2015 ta bay bira ‘strike two’ y cu tur respet pa tur hende pero ‘macamba’s honkballen niet’. Cu nan bo no ta hanja un di tres chens pa swing e bat. Despues di ‘blessuretijd’ scheids ta pita y cos a caba; esey ta nan style. Ta obvio cu gabinete berde lo no ta deacuerdo y no ta por nada cu Minister Plasterk a keda di propone un ‘geschillenregeling’ den zomer. Draagvlak Politico Hulandes ta caba na Juni pero Reino ta sigui y cu Aruba den dje, right?. OK, pero ta con anto?

Top Ads
Top Ads
Top Ads

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.