CMB BD

Draagvlak, un narrativa

Draagvlak, un narrativa
Top Ads
Top Ads
Top Ads

Den su di dos articulo pa Den Cayente, Tatitan ta haci un breakdown extenso riba e idea di ‘draagvlak’ pa cu Caft, 1613X, e refineria y con ta wordo hunga cu e palabra aki…

Luna di December ta den caba y a ainda no tin realismo, of por lo menos claridad, den Presupuesto 2016 of e cuenta multi-anual nobo, e asina yama “MRJ 2017-2020”. Lo unico cu por wordo saca afor ta cu gobierno a scohe pa mantene e “ahustenan” manera nan ta actualmente, stop of cambia cu e “24 ahustenan” manera nan tabata planea y spera cu e extra cash y crecemento economico genera door di e re-activacion di refinaderia lo “cover”. No ta bin mas “ahuste”, es ta mas, nunca tabata tin intencion. Pero paralel cu esaki por wordo observa cu CAft, durante su analysis di Presupuesto, tabata bou impresion cu ABB si lo bira un realidad y cu e lo genera rond di 50 miyon florin extra (ongeveer e mesun efecto c’un aumento di BBO di 1% lo tin). Esey no ta tur; e cuenta multi-anual bieuw “MRJ 2014-2018” claramente tabata mustra cu tur e Proyectonan PPP lo wordo financia via un “Aruba Investment Fund” cu tabata tin e famoso belasting riba transaccion bancario como fuente di entrada, cuminzando na 2016. Con a para cu esey? E reforma di motorrijtuigbelasting ya no ta un opcion mas, right? Right?

OK, ta con anto? Plasterk a haci na cuminzamento di November un bishita pa conversa tocante FDA, e predecesor di e AIF aki; por ta e lo a puntra, pero por ta no. Ken sa? E mes no tabata kier los nada. Y laga nos no lubida e Reforma Fiscal 2016 cu, segun MRJ 2014-2018, lo mester a genera 235 miyon florin extra na entrada publico durante e periodo aki pero alavez, segun MinFin, lo no tabata di crea mas presion fiscal. Anto PM kiermeen cu e “meevaller” di refinaderia lo por “cover” pa tur esaki? Hmm. Un otro cos cu tampoco ta bay door ta e eliminacion di 1613x. Esey MinLab a confirma y re-contra confirma luna pasa. Wow, esey a bay liher. No ta cu Parlamento lo trata e reforma’ki otro anja? Na mi parecer, e motibo cu Minister Croes a duna pa esaki tambe ta splica tur e otro desaroyonan menciona aki riba. No tin Draagvlak.

Draagvlak, un concepto basico den politica contemporaneo “à la Hollandaise”, no ta nifica sosten of apoyo precisamente, sino mi lo a usa e palabranan ey. Mas bien, e ta (segun Ruelle & Bartels 1998) un evaluacion di e “Big Picture” politico, di banda di esnan c’un interes mara na un beleid en cuestion, di cual e resultado lo ta cu “esnan interesa”, parti den “Doelgroepen”, lo respalda e beleid aki (activamente, dus “Tin Draagvlak”, of pasivamente door di no expresa desacuerdo, e ora ey “Tin minimaal Draagvlak”), of juist resisti e beleid (“No tin Draagvlak”). Con e interesnan politico en general di e hendenan den un Doelgroep ta fit den nan percepcion di e “Big Picture” ta loke ta determina si e evaluacion ta resulta den respaldo of resistencia, y con e Doelgroep su interesnan ta mara na e beleid en cuestion ta loke ta determina e forma cu e respaldo of resistencia lo tuma y alavez ta determina e typologia cu academiconan na Hulanda ta usa pa Draagvlak. Draagvlak Social ta un evaluacion cu ta tuma lugar serca nos, Pueblo di Aruba, y por yega na formanan di resistencia cu ta inclui mi debut como columnista pa Den Cayente, pero tambe Rocky Kelly su kimamento di tire. Draagvlak Politico ta ora mayoria den Parlamento ta saca su som y vota pro e ley di CAft sin puntra (abiertamente) dicon Artikel 2 lid 2 di e ley aki no ta wordo splica den Memorie van Toelichting, pero tambe tin cu bisa cu tabata e falta di Draagvlak Politico serca Staten loke a zorg pa e strategia di elimina 1613x wordo cambia (m’a bisabo cu e cos ey ta sona muchu catchy). Falta di Ambtelijk Draagvlak ta por ehempel ora Gobernador a dicidi riba su mes, a base di opinion negativo di Raad van Advies, di no firma Presupuesto 2014 na prome instancia (ta un par di dia despues cu Reino ta afirma e decision pa medio di un KB). Por ultimo, literatura tambe ta papia di Draagvlak Institucional cu ta un evaluacion na nivel di organisacionnan manera CAft, RvA, y CBA, pero tambe tin otro Doelgroepen manera gremionan, sindicatonan y fundacionnan.

Den e ehempelnan cu m’a duna por wordo ripara cu e Draagvlak (of e falta di Draagvlak) c’un doelgroep por tin (of no tin) pa un beleid en cuestion ta los fo’i e pregunta si e Doelgroep ta echt apoya e beleid of e figura politico cu a propone e beleid na prome lugar. E Doelgroep su interesnan politico en general hunto cu e percepcion di e “Big Picture” ta loke ta conta. Pero “the Big Picture” ta un cos masha grandi y compleho mes.Tin muchu hopi factor actuando parew y hopi biaha e ta rekeri experticio den multiple ramonan di conocemento pa hende por capta. Pa motibo di esaki sernan humano, desde tempo di antiguedad, a usa narrativa (un storia simplifica) pa splica con nan ta mira e “Big Picture” ta hinca den otro. Con Jesus Cristo a usa e storia di e Bon Samaritano pa splica Su concepto di amor pa prohimo ta un bon ehempel di loke mi kiermeen akinan. De hecho, culturanan tur rond di mundo ta yen di storianan cu a bira e fundamento pa e civilisacionnan cu ta existi awendia. Dus, un Doelgroep su percepcion di e “Big Picture”, incluyendo esun cu bo ta lesando aworaki, ta nada mas c’un storia, un narrativa. Akinan, mi querido lector, ta unda Draagvlak su rabo di porco ta krul, pasobra tur hende por conta nan storia na e modo cu nan kier.

Tuma e caso di e propuesta pa elimina 1613x cu a wordo afgewezen. Mi ta durf di bisa cu MinLab tabata sa masha bon cu e tabata hopi dificil pa e idea aki bay hanja Draagvlak serca Staten. Dicon pushele toch? Wel, pasobra ora bo ta purbando di bende algo, y bo sa cu bo MESTER negocia, bo ta cuminza halto, toch? Awor MinLab por bay sinta back c’un tegenpartij cu por sinti su mes “empowered” y lo por tuma un houding mas positivo y ademas, otro Doelgroepen cu no ta sinta na mesa (Pueblo) por tin e pecepcion cu tin flexibilidad y bon voluntad. Aunque e formulacion di e meta a cambia, e narrativa a keda esencialmente mescos, cu nos MESTER yega na un compromiso si nos kier mas empleo, pero awor a anjadi e cuestion di e 1300 hendenan empla via uitzendbureau cu por wordo manda cas di un dia pa otro. Esey no ta eerlijk y cu contrato pa tempo defini bo ta fix e problema, right? Mi no sa ken Minister Croes ta purba di tuma haci; e mes tabata Parlamentario ora e ley pa uitzendbureau a wordo proponi y pasa, dicon e no fix e problema e tempo ey? Ainda por amenda e parti aki cu ta regel uitzendkracht y sin mester di mishi cu 1613x. MinLab tin e cartera aki pa dos anja caba; awo e ta bin cu e cos’ki? Un uitzendkracht semper ta mas caro c’un trahado vast, pasobra bo tin cu paga pa e trahado plus e ganashi di e uitzendbureau. Si asina mes tin 1300 hende cu no por hanja trabou vast, con bo por spera di genera mas empleo duradero door di cambia un ley? Y si bo cambia ley, kiko ta stop un dunador di trabou di unicamente ofrece empleo temporal si lo unico cu bo ta zorg ta pa e carousel draai mas liher y hende por bula aden y afo mas “cost efficiently” pa e werkgever? Mihor Minister hanja un bon respuesta pa tur e preguntanan aki prome cu e hanja durf di sinta back cu sindicatonan. Ah, esey si ta e cos leuk di Draagvlak y narrativa, e ta hacie facil pa bo “flip the script” riba nan. Anto como “cherry on top”, MinLab ta menciona un par di cifras, style di: “..hobennan desemplea (22.8%), hendenan den bijstand (2500)..”, pa duna peso na su argumento. Tristo esaki por ta, pero “on the bright side”, juist e parti aki di MinLab su narrativa ta esun mas facil pa contra-argumenta. Bo ta simplemente contrasta MinLab su storia cu MinTur su storia. Si turismo ta bayendo asina bon, y tin dus crecemento economico, ta dicon nos tin cu cambia regla pa crea mas empleo anto? Demagogia manera esaki ta nada mas c’un modo di tene un Doelgroep di hende desfavoreci rehen (argumentativamente) pa purba di pone otro Doelgroepen assimila MinLab su narrativa.

E contraste ta resalta mas aun ora bo ta pone MinLab su storia banda di PM su narrativa na cuminzamento. Si re-activacion di refinaderia ta nifica un boost asina grandi pa crecemento economico, manera e ta proyecta den Presupuesto 2016 y MRJ 2017-2020, ta hopi empleo mes ta bay wordo genera otro anja, toch? Dicon tin cu cambia regla anto? Pasobra PM su narrativa mes no ta klop, por ta? “Low-rise hotel ta aporta mas na economia cu henter e refinaderia”, ken ta corda e storia ey fo’i anjanan 80 y 90? Ami mes tabata muchu jong, pero tur ex-studiante di FEF na Universidad mester por corda con, den temponan di Valero su “hey-day”, ex-hefe di SER Ben Marapin tabata hamer riba esey durante su les di macro-economie. Comprondemi bon, e cos’ki ta un boost economico “masha” bon bini mes, pero laganos no perde sentido di proporcion (of juist si, si bo kier por guli manda abou PM su storia). Un otro cos ta cu awor nos ta apenas den e fase di formalisacion di e deal cu CITGO. Un eventual empuhe economico lo tarda sigur un mitar di anja prome cu e wordo sinti (si no ta mas) y sowieso e ta dificil pa calcula con duro e empuhe lo por ta. Pero e ta facil si pa overschat den Presupuesto y entre mas halto bo estima crecemento economico, mas placa bo por presupuesta pa fia (y entre mas abou e crecemento, menos placa). Ta pa e motibo aki cu gobierno ta hint aki-aya pero no ta papia of pone nada concreto den su calculacion? Nada cu ta para den Presupuesto of MRJ 2017-2020 ta “toetsbaar”, segun CAft. Ni entrada, ni gasto. Y nada di e asistencia technico cu lo mester bin fo’i Hulanda (mi ta corda cu esaki tabata tin asina hopi prioridad cu gobierno y Reino a dicidi pa pone explicitamente den Protocol di Mei) of di inversion pa mehora gobierno su aparato di control financiero. MinFin por bisa cu e mayor esfuerzo ta wordo haci, pero “from Day One” ela confesa cu no tin suficiente capacidad. Y aparte cu no tin un bon grip di e situacion, tampoco tin “houvast” na propio regla. Letterlijk. E bendito Spending Cap Rule, e limite maximo di cash cu mag di sali fo’i caha estatal tur anja, ta wordo surpasa significantemente den Presupuesto. No worry, refinaderia ta bay habri back y ta bay tin mas placa, right? Hmm. Dicon no keda hanteer e Spending Cap (y lo demas) y usa e extra cash genera door di e “meevaller” di refinaderia pa baha debe envez di djis consumi e recursonan? Esey tabata e plan, toch? Aki ta mustra e gran fayo den ley di CAft. Niun caminda ta para cu,den caso di “meevaller” grandi, mester tin e sentido comun di usa esaki pa mehora posicion financiero. Ta deficit su percentahe den BBP so ta conta, kiermeen c’un eventual crecemento economico mas halto cu esun proyecta (lesa: e “noemer” den e breuk ta bira mas grandi, dus e breuk mes ta bira mas chikito) ta bira nada mas c’un excuus pa bay fia mas placa, manera a sosode na Grecia entre anjanan 1990 y 2008. Durante e periodo aki e debe Griego tabata crece hunto cu e economia, tampoco tabata tin suficiente capacidad di control financiero y e narrativa cu e politiconan ayanan tabata duna ta mescos cu esun di PM awor (y e meta real di e narrativa Griego tambe ta mescos, namelijk, evita e responsabilidad politico di tuma medida). Un narrativa cu lo sona “bekend in de oren” na Hulanda y serca professor Bakker na Corsow. Pero si gobierno ta mustrando e mesun patroon di comportamiento di temponan prome cu LAft, con bin cu ainda Aruba no a hanja aanwijzing (ni tampoco lo hanja prome cu Juni 2016) fo’i Reino? Ta un cos bisto cu Plasterk ta usando CAft como buffer politico pa no tin cu responde preguntanan dificil, pero di banda di “nos” organo fiscal anto? Por ta bo lo por a ripara cu na cuminzamento mi no a duna un ehempel “in casu” di Draagvlak Institucional. Ah, esey ta pasobra ami ta di e tipo di hende n’ey cu ta gusta laga e carni pa ultimo.

Cft na Corsow (dus CAft tambe) den su reporte anual 2015 ta mustra cu su narrativa di e “Big Pricture” ta cu e organo fiscal ta opera den un “spanningsveld” di interesnan y expectativanan, den cual e organo su habilidad di fomenta debate publico ta mas effectivo cu cualquier dwangmiddel cu e por dispone di dje. Cft a dura anjas pa por logra cu opinion publico mirele como un “truthteller & trusted advisor” den otro islanan y na Aruba e proceso aki ta apenas cuminzando. Djis duna recomendacion pa aanwijzing cada rato lo stroba e proceso y ta trece e riesgo cu e debate publico ta bira contra nan y deteriora asina e Draagvlak Social cu mester tin pa un organo fiscal por ta efectivo, segun literatura riba e topico di supervision financiero. “Allemaal leuk en aardig”, manera nan ta bisa den Hulandes, pero bo no por spera cu e cuenta no ta bira back bin dal bo si den un rapport na September bo ta bisa cu e meta fiscal pa 2015 ta “moeilijk haalbaar”, djey bo opinion ta cambia pa “so far, so good” pa despues, ora por fin ta wordo insinua MITAR DI DECEMBER cu tin un di tres kwartaalrapport, bo ta bisa cu falta hopi esfuerzo mas ainda. Duna smoesje cu bo tabata bou impresion cu 50 miyon florin extra lo wordo genera door di ABB ta un respuesta hopi insatisfactorio pasobra, pa di prome, e no ta yuda e meta pa 2015 (ABB lo tabata di drenta na vigor otro anja), anto pa di dos, e 50 miyon lo no “cover” pa tur e tegenvallers cu sigur tin, plus tur e obligacionnan cu e 2e kwartaalrapport ta bisa cu a wordo hala pa otro anja (e ultimo detalle aki ta e motibo cu gobierno a duna pa hecho cu nan a fia 7 miyon dollar menos cu tabata planea e anja’ki; e unico plakprentje mi ta duna MinFin so far. Pero awo ta resulta cu mester bende gebouw di Ministerio Publico y mester bay huur, dus bijdeze mi ta ranca e plakprentje y kima e cos ey). Un otro detalle ta cu e suppletoire begroting a wordo trata den Staten, pero no tin niun feedback tocante di esaki den e website di e organo fiscal. Hmm. Eigenlijk esaki no ta “djis un otro detalle”, pero e fayo grandi den transparencia aki no ta nada compara cu e hecho cu Presupuesto 2016 y MRJ 2017-2020 no ta toetsbaar; esey ta manera si CAft ta un toro y bo ta castrele. Lagami dunabo un ehempel, nos ta stop cu MRJ 2014-2018 na 2015 y nos ta sigui cu MRJ 2017-2020, dus no tin echt un plan pa 2016, style di: “ban wak con e anja’ki ta bay”. For di e punto di bista di control financiero (di banda di MinFin y di CAft), bo no tin un “beginstand”, dus bo no por controla un “eindstand”. Esaki por splica dicon gobierno ta tarda pa bin c’un Presupuesto definitivo (mester yega na un beginstand cu ta lo mas precies posibel), pero alaves e ta mustra cu e gobierno aki nunca a traha “planmatig”, of miho bisa, cu gobierno tin e habito di cambia e plan ritualmente tur anja. Djis pa bruha tera un tiki mas; leuk, no? Anto awor gobierno ta hint cu CAft lo warda te Mei 2016 pa haci un “reality check”? Awel, sowieso por wordo constata cu e organo fiscal ta mustra di tin hopi pasenshi cu Gabinete Eman y ta haci esey cu motibonan rasonabel, pero e Draagvlak Institucional cu CAft a demonstra di tin pa gobierno ta convencemi cada vez mas cu e motibo real pa e Draagvlak aki ta mara cu Draagvlak Politico cu tin na Hulanda.

Kiermeen cu awor nos ta yega na e “toetje”. Bo ta corda con CAft, deacuerdo cu su mesun storia, ta hanja su mes den “spanningsveld”? E semantica di e palabra ey ta implica cu e miembronan di e college ta wordo ranca fo’i diferente banda door di interesnan pafor di ambito di control financiero. Ta obvio cu akinan nan kiermeen interesnan socio-economico, pero asina mes, toch mi tin cu puntra: ta ken lo por tin e poder pa “pull strings” y kiko por ta nan motivacion? Wel, cu mi bisa cu Gabinete Rutte tin hopi interesnan mara den nan campanja pa un di e dos asientonan disponibel den Conseho di Seguridad di Nacionnan Uni, mester por ta e “understatement” politico di e decennium aki. No ta solamente cu e aspecto aki di Hulanda su politica internacional a bira hopi relevante den luz di e acontecimientonan na Ukraina y Paris. E push pa e asiento ey ta e “speerpunt” di Rutte (bon VVD’er cu e ta) su agenda politico fo’i dia bieuw, loke ta ponemi pensa cu e idea tras di push tin mas di haber cu e capacidad di duna e “Business Lobby” Hulandes mas traccion internacionalmente (vooral na Merca y Europa). “Babylon is as Babylon does”, mi ta bisa semper. Anto e storia aki te hasta tin un twist geopolitico. Hulanda ta den competencia cu dos otro paisnan Europeo pa e dos asientonan y un di nan, Italia, ta e lider fundador di e “Coffee Club”, un aliansa dentro di UN cu ta e rival di G4 (Brazil, Alemania, Japon y India), cu ta un grupo cu ta respalda Hulanda. Dus tin dos asiento, tres paisnan campanjando y hopi mas nacionnan grandi cu nan wowo riba e asunto. Bo por maginabo e perdida di prestigio cu Rutte personalmente lo sufri si Hulanda tin cu cay afor pasobra un ex-kolonie a hiba un asunto interno te na assamblea di Nacionnan Uni? Esey ta loke e carta cu e Premiernan Caribense a manda en conhunto pa PM Hulandes tabata implica. E eleccion mes ta bay tuma lugar na cuminzamento di Juni otro anja y mientras tanto e gobiernonan di Aruba y Hulanda ta den un sorto di “mutually assured destruction”-scenario cu ta crea Draagvlak na Hulanda pa e gabinete berde.

E storia no ta caba eynan. CAft obviamente no ta bay laga un Presupuesto mal traha ponele den un “controle-technisch buitenspel” y si asina e ta mustra anto esey ta schijn. Nan bezig ta “build up e file”. Ta awor apenas nan ta hanja e contract di e deal di APFA pa mira, ta awor nan ta hanjando informacion mas riguroso tocante e costo di e Proyectonan PPP y mescos cu anja pasa, ta awor apenas cu ta bay bin na cla cuanto placa na “tegenvallers” tin pa e anja’ki (corda bon: mester yega na un beginstand). Ora bo ta un werkgever y bo no kier tin un mal trahado mas serca bo, kiko bo ta haci? Bo ta “build up e file”, hiba bo caso dilanti y bo ta “weg” e tercio. Ora bo ta OM y bo tin cu pone un criminal den carcel, kiko bo ta haci? Bo ta ”build up e file”, hiba bo caso dilanti y pone e tercio tra’i tralie. Na mi parecer, ta esey CAft ta haciendo. Nan bezig ta “build up e file”. Draagvlak Politico Hulandes ta caba na Juni pero Reino ta sigui y cu Aruba den dje, right? OK, ta con anto? Plasterk a bin na November pa conversa tocante e futuro di FDA, un fondo di desaroyo cu no ta suppose di existi mas otro anja. Por ta e lo a puntra. Ken sa? E mes no tabata kier los nada.

Top Ads
Top Ads
Top Ads

About The Author

Related posts

2 Comments

  1. Pingback: Draagvlak 2: Building up the file | Den Cayente

  2. Pingback: Draagvlak 3: Ta con Anto? | Den Cayente

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.