CMB BD

Also sprach Tatitan

Also sprach Tatitan
Top Ads
Top Ads
Top Ads

Den Cayente ta introduci su columnista nobo: Jonathan Mejia, AKA Tatitan.

E0DC305B-2FFB-4237-A64F-9E7766B1ABE7

E ta na serio awor. Dos di e tres partnernan den dialogo social, es ta gobierno y gremionan, a bin di acuerdo cu e eliminacion di nos proteccion laboral y, casi pa Divina Providencia, full e asunto aki a te hasta hanja un nomber catchy p’e sindicatonan por sake afo den media y e keda pega den bo mente: “1613x”. Ta sona manera algo saka fo’i Marvel comics. Obviamente, Minister Paul Croes y gremionan a haci manera no tin niun costo social mara n’e reforma aki, bisando cu e lo genera mas empleo y cu si bo ta un bon trahado bo no tin nada di worry, pasobra no ta rasonabel pa pensa c’un dunado di trabou lo kier perde un bon trahado, right? Tur hende ta gana dus.

OK pa cuminza, djis pa cuminza, segun spirito di e ley laboral Arubiano, un dunador di trabou semper mester por demonstra cu e tin un motibo rasonabel pa manda un hende cas, right? Awel, tin suficiente casonan bringa y gana den corte pa tur hende, incluyendo Minister, por sa cu no tur ora un dunador di trabou ta actua rasonabelmente. Pero bo no mester niun motibo pa’bo no renoba contract, of miho bisa, bo por inventa cualquier excuus. Dus, un funcion primordial di e ley por wordo ge-“bypassed” di e modo aki. Normaal. Anto mi no sa si esaki ta rasonabel, pero irracional sigur si e no ta. Mescos cu tur otro cos den politica, e cuestion ta sinta den con abo formula bo mes.

Por ehempel, maske mi no ta hanja rasonabel cu e cambio di ley lo nifica “the beginnning of the end” di vaste dienstbetrekking na Aruba den sector priva (y publico, sigui lesa), mi por pensa hopi motibo perfectamente racional dicon dunador di trabou, y en particular esunnan grandi, lo por zorg pa “the end” bira un realidad (no di biaha, claro; tiki pa tiki). Fo’i mi cabes:

-Door di limita e number di hende riba vaste dienst, un compania lo por adapta su gastonan mas efficientemente.

-Door di limita e number di hende riba vaste dienst, un compania por evita vergrijzing di su forza laboral.

-Un patroon bisto na Hulanda ta cu companianan lo opta di no tin hende den vaste dienst pa minimalisa e incidencia di “Burn Out” den nan staff. Esaki ta pasa hopi na nivelnan den e organisacion unda “on-the-job training” ta suficiente pa haci e trabou, pero tambe na nivelnan halto cu ta rekeri mas experticio di parti di e trahado.

-Purba di “weg” trahadonan vast y no laga relacionnan di trabou nobo loop over pa vaste dienst por potencialmente spaar un compania grandi hopi cen den cesantia.

-Finalmente (ban lage t’eynan) nos ta yega na mi motibo favorito. Manera e CEO di OCP den e “Robocop” original ta bisa: “No one’s indispensable”. Door di vervang hende den nivel halto c’un contractant, pa despues keda vervang, bo por ta sigur como werkgever cu b’a “send the message” n’e resto di staff.
Kiermeen cu nan lo por tuma un trahado, ponele mula 2 anja largo y mande back den mercado laboral full “burned out”, pa despues haci mescos cu e proximo voluntario? Mi por ta un pessimista, pero con cu bo kier mirele, e reforma aki ta keda un perdida di calidad di bida p’e clase trahado di Aruba, sin cu nos mira algo a cambio di esey. Eliminacion di 1613x lo NO genera mas empleo (corda empleo duradero), pasobra un negoshi, fundamentalmente, no ta “Hire & Fire” a base di un ley laboral sino a base di e “Entrepeneur” su percepcion di cuanto mercancia e ta bay move, cuanto servicio e ta bay presta y cuanto placa e ta spera di gana. Den otro palabra, su “Sales Plan”, no un ley laboral. Si cos ta bon bo ta buska mas trahado, ora cos ta slow no; t’asina di simpel. Kiermeen cu si despues ta resulta cu SI tin mas empleo, lo NO ta pasobra un ley a wordo cambia. Pero Minister y gremionan sigur si lo purba di tuma e credito p’esaki. Awor si e economia slow-down, e dunador di trabou lo tin un instrumento poderoso pa baha su gastonan door di manda hende cas, sin cu e trahado of e sindicatonan por haci algo, behalve mas buya y bululu.

Maginabo e siguiente scenario: Por ta e gremionan lo tin un deal sera cu Minister, tra’i lomba di Pueblo, cu e dunador di trabou grandi lo emplea mas hende djis pa laga e beleid mustra di ta funcionando. E extra gasto lo ta un “small price to pay” p’un beneficio duradero y despues, ban bisa entre 8 of 24 luna, nan ta “weg” tur hende cu nan ta hanja overbodig. Normaal. Esaki lo no sorprendemi niun tiki, menos aun tumando na cuenta cu gobierno mes tin hopi hende pa “weg” y tin cu purba di hinca den sector priva. Minister, usando un coneccion politico cu gremionan (lo tin un par di sponsor hinca eyden), lo por te hasta selecciona ken ta subi mercado laboral via e “red carpet” aki a base di “demographics”, pero no pa yuda hende hoben of 50-plussers, sino pa maximalisa e percepcion den su doelgroep cu “cos ta dificil berdad, pero hey, Paul a yudami bon si”. Manera Bogey ta bisa pa sera e pelicula “Casablanca”: “I think this is the beginning of a beautiful friendship”

Tur hende ta gana? Oh, please. “Survival of the Fittest” t’un cos cu no ta geld p’e trahado solamente, pero vooral pa negoshinan tambe y e cambio den ley lo por zorg pa competencia, no necesariamente inhusto, entre compania grandi y chikito, vooral den sector di servicio. Ta logisch; den un ecologia, ora un factor fundamental ta cambia den e habitat, t’e animal cu mas lihe adapta t’esun cu ta survive y sigui evoluciona. Maginabo e scenario aki: Por ta MetaCorp semper tabata kier drenta e mercado di contratista di trabou chikito pero e tabata muchu riesgoso (door di ley laboral) pa tuma bosh’i hende pa traha den bosh’i crew chikito pa atende e mercado aki. Cu e eliminacion di 1613x esey si lo por, y ata bo tin awor cu tur contratista chikito na Aruba lo mester bay competi c’un monster cu ta hopi mas miho capitaliza cu nan. Den serio, mi no ta kere cu tur hende den gremionan tin nan caya bon mira. Mescos cu mi no ta kere cu dealershipnan ta comfortabel cu e posibilidad cu menos hende lo por bay fia placa pa cumpra un auto.

Pues e situacion den dialogo social, manera e ta bayendo, ta un “power play”, no un negociacion y e cambio di ley aki ta mas un asunto politico cu economico. Y den politica percepcion ta manda riba contenido, pasobra contenido “is what it is” pero percepcion por wordo manipula. Por ehempel, un eventual eliminacion di 1613x lo por cambia opinion publico tocante e proteccion laboral cu ambtenaar den vaste dienst ta goza y esey lo por haci e cortamento den sector publico mas facil; “no hay mal que por bien no venga”, nan ta bisa den Spanjo. Ta logisch, toch? Anto cu Minister ta purbando di manipula Pueblo su percepcion ta bisto caba fo’i tempo cu e prome infomercial a sali na television. Den e caso aki, door di no haci distincion entre kiko ta rasonabel y kiko ta racional, loke Minister ta echt bisando ta cu si despues bo contract no wordo renoba e ta “eigen schuld, dikke bult”, siendo cu esey, manera m’a bisa na cuminzamento, no ta necesariamente berdad.

Pero asina mes, toch mi mester bisa cu e manipulacion ta dunando fruto. M’a tuma nota di un argumento, den boca di mas di un hende, cu mas di 20 anja di existencia di 1613x a zorg pa un cultura di trahado inefficiente y floho cu ta biba lekker riba costilla di su dunador di trabao. Esaki no ta solamente un argumento polarizante y fofo, pero tambe uno cu ta trapa riba dignidad di e gran mayoria di trahado cu si ta show-up tur dia pa traha manera Dios ta manda. Ta con otro nos lo a yega n’e progreso cu nos a logra te awor, sino ta danki n’e esfuerzo di e gran mayoria’ki? Hende cu ta sostene e argumento aki ta kom over manera si nan ta pensa cu nan so ta profesional y tur otro hende ta traha keks (anto djis pasobra e chick den booth di drive-thru no a smile cu bo? Hey, tur hende por tin nan “bad day”). Ami, personalmente, no ta hanja rasonabel pa perhudica clase trahado pa via di un par di appel putri. Si t’esey t’e argumento.
Laga nos tene na cuenta cu teoria di management ta bisa cu bo no por hanja mas productividad cu estimulo negativo solamente. Cu esaki den mente, e sindicatonan por eherce Pueblo su “Will to Power” y negocia. E gremionan y Minister sa masha bon cu pa nan logra nan meta nan MESTER negocia pa nan yega na un consensus duradero, pasobra aki dos anja tur cos por cambia atrobe. Vaste dienstbetrekking mester por keda existi, liber di tur presionnan systemico, pero dunador di trabou mester por hanja e instrumentonan pa por sigui pusha nos economia dilanti. Problema ta cu no lo tin un solucion perfecto. Pues esaki ta un posibel contra-oferta: Ofrece e werkgever e posibilidad di tuma trahado a base di contract di 8 luna, sin limite di renobacion, cu e condicion cu salario di un contract asina no por ta menos cu , ban bisa, 35% por encima di minimumloon (dus si minimunloon subi, e ondergrens aki tambe ta subi). Style di hanchi: bo kier e, paga p’e, asina di facil. Di e manera aki, sindicatonan por logra scapa vaste dienst fo’i un morto lento pasobra e werkgever lo mester saca su som prome, envez di automaticamente bay over na contract di 8 luna y ademas gobierno lo por potencialmente hanja mas entrada di belasting. E riesgo di e systema aki ta si cu werkgevers por ta lo no kier duna trabou vast mas na trahado cu salario riba di e ondergrens (perhudicando e clase medio en particular), a menos cu echt mester. Tur esaki ta otro patroon bisto na Hulanda. Hey, m’a bisabo cu no lo tin un solucion perfecto.

PSYCH!! E paragraaf aki riba ta, sin duda alguna, e “narrative” cu Babylon kier pa nos asimila. Cu nos MESTER yega na un compromiso si nos kier mas empleo. Pero e no lo ta trabou vast, sorry. Bo ta hanja bo buelta den e carousel, djey bo ta bula afo y bo ta warda pa un chens pa bo bula back aden, ad infinitum aut nauseam. Esaki no ta “Will to Power”, mas bien “slave mentality” (of “slave master mentality”, depende di ken bo ta). Si “actualmente tin un concurencia grandi pa mantene un bon trahado na trabou”, manera Minister Croes a declara, y Turismo (e motor di nos economia) ta bayendo bon manera Minister Oduber ta bisa, ta dicon nos tin cu bay cambia e reglanan pa hanja mas empleo anto? Pa atende un doelgroep? Hmm.

Ami ta bisa “nos”, pero ta parlamento ta esun cu por cambia un ley. Nan a laga sa cu ta te otro anja nan lo bay atende e caso y, honestamente, mi no sa den ki direccion nan lo pone e pikete n’e bal di biljart aki. Esaki si mi sa bisabo: 1613x ta sona HOPI catchy, e ta facil pa corda y e ta ECHT keda pega den bo mente. Net bon pa un Calypso of un slogan di campanja; mi ta bisabo, e nomber ey a cay fo’i cielo.

Top Ads
Top Ads
Top Ads

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.