CMB BD

6 Dia

6 Dia
Top Ads
Top Ads
Top Ads
- Anuar Habibe, 2014
– Anuar Habibe, 2014

E portret akiriba a wordo saca dor di Anuar Habibe. E ta den mi opinion e mihor portret di noticia di aña pasa na Aruba. Bo por mira y interpreta hopi cos studiando e portret aki – esey mi ta laga completamente na abo – y desde cu Raad van State a duna su opinion riba con Hulanda a handle e welga di hamber di Mike Eman, Desiree Da Sousa-Croes y Clarisca Velasquez, el a bira relevante atrobe pa un rato.

Mescos cu ainda basta hende mi ta corda e welga di hamber di aña pasa. E anuncio, directamente despues cu prome minister Eman a bishita gobernador Refunjol, a bin completamente di sorpresa. Obviamente e ambiente tabata hopi dramatico cu cantidad di hende presente, apoyando e politiconan y exigiendo na gobernador pa ‘teken bij het kruisje’, pero nunca mi por a presinti cu e situacion lo bira asina hot. Pensando bek mi mester bisa cu e dianan cu a sigui tabata hopi impactante p’ami personalmente. E tension, e surrealismo, e locura di henter e situacion a cay mi duro. Imaginabo para dilanti un Fort Zoutman na unda na un banda un grupo tabata sinta basila, come, toca musica y warda tempo pasa, mientras poco meter mas leu tres persona tabata literalmente matando nan mesun curpa. E ‘disconnect’ straño ey nunca lo mi lubida. Loke a haci e impresion aki mas fuerte ainda tabata hecho cu alrededor di e sitio y den resto di pais bida tabata parse di ta siguiendo manera nada un pasa. Nan tabata cu nan so eynan na Fort Zoutman, pero e stakes – a lo menos pa esnan cu tabata welgando – tabata super halto. No djis pa nan salud, pero tambe pa nan credibilidad y futuro politico. Mi ta corda e momento den cual Mike Eman a cuminsa yora durante un conferencia di prensa. El a bandona e sala lihe pero nos bista a topa otro. E pida di un seconde ey pa un of otro motibo a keda cumi.

Mi ta reportero y semper mi ta purba di ta stret y neutral, pero mi ta hende tambe. Ora bo entrevista un persona cu cierto regularidad bo no por yuda di crea un cierto bond cu nan, maske con superficial. Bo ta cuminda otro, trata otro netjes. Ami ta haci mi best semper pa tin un cierto entendimento cu politico di tur partido y mi ta ripara cu nan ta aprecia esaki, ni con nan no gusta loke mi ta skirbi hopi biaha. Durante e welga di hamber, ora mi tabata eybanda pa cubri, tin biaha Eman tabata sali pa saluda hende. Diferente biaha mi a pidie pa e cuida su curpa. Tabatin e rumornan di consumo di Ensure y cu den marduga nan tabata sali for di e heki tras di e tent pa drenta Marisol Building via porta di patras. Mirando atras, mi no ta echt kere cu esaki tabata berdad pero den e dianan ey mi tabata spera cu si, simplemente pasobra den mi opinion e situacion aki no tabata bale la pena pa sacrifica salud y te hasta bida p’e. Personalmente mi no tabata di acuerdo. Ki mishi lider di un pais liber uza e tactica di ‘callejon sin salida’ di un prizonero na Guantanamo? Esey no ta defeat the purpose completamente? E no ta hinca bo den un posicion di no-negociacion for di cual bo no por sali sin haya sla? Si bo tin cu muri, no hacie a base di loke ta claramente un calculacion robes.

Cu Hulanda tabatin su agenda cla pa hinca Aruba bou supervision financiero total mescos cu St. Maarten y Corsou tabata bisto. Cu nan a instrui gobernador, siendo cu gobernador ta independiente manera Raad van State ta señala awor ta indicativo di con leu nan tabata willing pa bay. Pero no lubida tampoco cu e situacion aki por a wordo evita. Pa cuminsa Aruba por a haci mas pa tene su debe externo in check. Anto e propio gobernador mes – independientemente – a duna gobierno oportunidad pa bin cu un presupuesto cu lo por evita intervencion, mandando e concepto bek pa Raad van Advies te dos biaha. Anto lesando e corespondencia entre gobierno y minister Plasterk den e lunanan prome, por conclui tambe cu gobierno di Aruba no tabata por of kier comunica su argumentonan – entre otro pa un begrotingskamer – suficiente cla y fuerte cu Plasterk. Asina e minister por a djis keda para rigido riba su puntonan. E cos aki tabata brouw for di basta tempo caba, pero gobierno di Aruba pa un of otro motibo no tabata anticipando of simplemente tabata nengando loke Hulanda tabata build up pa haci. Eigenlijk for di momento cu CDA a bay y Rutte a bira prome minister na Hulanda, gobierno no por a logra di cambia su approach, pero tabata bisa henter ora si cu relacion tabata mihor cu nunca. Ora cos a sali for di man, e caida tabata extra doloroso. Na final a termina e welga, no pasobra a logra algo, pero pasobra algo hopi mas grandi – MH17 – a tuma e newscycle over. E smaak cu a keda di esey tabata amargo, a pesar di e alivio cu niun hende a cay muri, aunke cu poco tempo despues Desiree Da Sousa-Croes a haya un TIA.

Tin hende cu ta gusta bisa cu Eman no tabata mucho skerpi den e periodo ey, mirando e presion cu tabatin riba dje for di Hulanda. Cu por ta e lo a bira loco. Durante debatenan oposicion gusta hint na esey. Mas cu claro henter e episodio aki lo mester a trauma Mike Eman di un of otro forma, pero el a bounce bek. Nos tur sa cu hende sa bula nan chip pa hopi menos. Ami ta kere cu Eman simplemente a calcula robes. Por ta e yamadanan di Rutte den marduga tabatin un efecto y a pone actua riba emocion, pero esey no ta locura y ami no kier huzge riba esey, pasobra ami no por imaginami kico e presion ey lo por haci cu cualkier persona. Nos tur por haci fout, y punto.

Tin fuentenan cu a contami cu e decision pa bay den welga di hamber tabata uno cu el a tuma su so y cu niun hende rond di dje tabatin e modo pa por convence pa haci otro. Si esaki ta berdad, anto e ora ta esey si mi ta punta dede riba dje, pasobra eynan bo ta mira cu – a lo menos na e momento ey – prome minister no tabatin un sistema di feedback rond di dje. Of bo tin cu bisami cu nan tur tabata di acuerdo cune. Pero mirando con e cos aki tabata doomed from the start, esey ta di duda. Manera mi a bisa, hende sa haci fout, pero responsabilidad di un lider ta pa juist tin hende rond di dje cu por bise ‘hey mi no sa si esaki ta e mihor strategia’. Bo no ta kere?

Na final, e welga di hamber a produci perdedor so. Mike Eman no a logra lanta y uni e pueblo cu su accion – te hasta hende den Bestuurskantoor a keda sin bay apoya – , y ademas su reputacion den Reino a come basta sla, for di cual el a tuma basta tempo pa recupera. Y na final supervision financiero a bin toch, aunke cu cambionan cosmetico pa scapa cara un tiki. Un parlamentario cu a participa a haya un emergencia medico serio despues di e welga. Pa loke ta e otro parlamentario, hende awor di baina ta corda cu el a participa. Gobernador te despues di su retiro lo mester tene cuenta cu opinionnan dividi riba su actuacion. Y finalmente Hulanda a perde credito den resto di Reino cu e manera con nan a silencia Aruba den Rijksministerraad. E opinion di Raad van State cu a sali siman pasa ta djis confirma nan actitud di aña pasa un biaha mas.

Cu RvS aworaki ta declara cu gobierno di Reino no tabatin base pa impone un KB via gobernador ta vindicacion pa Mike Eman, pero solamente pa loke ta intervencion di Reino (petje af pa esey, sinembargo). No pa e presupuesto di 2014 (puntra Algemene Rekenkamer) y – maske con ta purba di bira e storia awor – tampoco pa e welga di hamber. Pasobra con cu bay bin e preguntanan cu Tweede Kamer y parlamentonan di Aruba y Corsou a haci na RvS lo por a wordo haci tambe sin cu hende lo mester a tuma decisionnan asina repentino y drastico, riesgando nan bida y tambe reputacion di nos pais.

Top Ads
Top Ads
Top Ads

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.