CMB BD

Paz

Paz
Top Ads
Top Ads
Top Ads

1237062_10151631593340998_897065235_n

Drecha parlamento tabata un tremendo idea, pero semper tin un cu kier haci dimas. No comprondemi malo si. Paz y union, I’m all for it, keremi. Si tin un hende cu a fada di e polarizasion politico riba e pida baranca aki ta ami. Pero no bay haci un hippie prayer circle den parke, bati pecho dilanti camera y keda sin haci e asercamento. Si di berdad kier comberti e violencia di e disturbionan den algo cu no ta djis pone e partido na mando den un bon bista pero mas ainda marca un punto di cambio den nos historia politico, anto e ora ey e extra mile ta loke ta rekeri. E mensahe tey caba. Prome minister mes tin su storia cu amigonan di e otro partido cu el a post riba su wall, y hunto cune practicamente tur hende tin nan amistadnan y te hasta lazonan familiar dividi. E tono ey ta loke mester sigui cune, no un prayer circle den parke of palabranan bunita den discurso. Sea sincero anto inverti den paz. No djis bistie manera un camisa blanco. Haci e invitacion ey pa sinta papia na e otro banda, y hacie ora niun hende ta wak bo. Insisti riba dialogo y logra acorda cu otro cu e violencia di e siman anterior bou ningun circumstancia mag ripiti su mes, di ambos banda. Si no coy telefon, si bisa no of si ta chercha, anto e ora ey haci e yamado publicamente. Haci e buya pa e motibo corecto. Yama pa un discusion nacional y keda enfoca cu ehempelnan cla riba loke ta uni nos como pueblo.

Di otro banda mi ta keda wak y scucha con oposicion ta purba mantene e rabia den su hendenan. Na radio ta bisa cu voz duro cu violencia den caso aki lo por ta hustifica, mientras cu tur e lunanan cu a pasa no a tuma accion politico siendo cu esencia di e ley di Caft tabata bon conoci. A scohe pa un otro tipo di accion, esun di bula aden pa votacion y lanta bo hendenan pa subi caya, ora practicamente no por haci nada mas cu esey. Biaha tras di biaha ta yama pa un Arubian Spring, sin pensa riba con e Arabian Spring a manca paisnan manera Tunisia y Egipsio, matando centenares si no ta miles di hende. E ta un yamado peligroso pa un revolucion oportunista. Pa yama e cinco detenidonan cu a keda sera pa ‘heroe’ ta completamente for di sla, con cu bo wak e. Aki nos ta na Aruba, no na Palestina of na 1977. Che Guevara no tabata un Arubiano. Betico si y e tabatin hopi mas nuance den su politica cu hopi hende awo kier corda. Sanger cayente no ta un asset y e riesgo y prijs di violencia no ta nada pa romantisa anto sigur no pa un proposito puramente politico. Na final di dia si algo pasa na unda tin victima, djis guess serca ken e responsabilidad ta bay cay. Pa uza nan mesun slogan: Aruba merece mihor cu esaki. Aruba merece un otro tono for di oposicion. No menos critico, pero sigur mas responsabel, sincero y balansa. Y si e cell ey cuminsa ring, tuma e yamada. Of abo mes tuma e stap. Nunca ta laat.

Bo kier gana hearts and minds? Haci drechi enbes di hunga wega bisto. E lenguahe tin cu cambia na e emisoranan, di e parlamentarionan, e gobernantenan y e militancia. Paz ta dificil, pero nos tin cu yega eynan anto move tambe pasobra e ruta cu e ambiente politico ta tumando awo lo por caba na violencia cu morto. Si no ta den den futuro cercano, anto sigur den proximo temporada di eleccion. Dia 27 nos a smak sanger, y una bes bo haci esey e caminda bek ta hopi mas duro cu e tabata caba. Ta mustra cu hendenan na ambos banda aworaki no por ta mas leu di otro. Na ambos banda tin hopi dolor y reproche, pero tin mucho den wega – nos turismo, nos siguridad, hende nan bida – pa no purba.

Ami no ta compronde pakico ta keda scohe pa desorden y violencia na un banda y gestonan bashi na e otro, siendo cu e electorado cu ta dicidi eleccion – no e militancia di geel of berde pero e swing voters – claramente ta rechaza ambos. Djis subi Facebook y topa e mayoria. MEP y AVP mester stop di para grita y haci buya den direccion di votadornan y cuminsa papia cu otro. Tras di porta sera pa mi parti, y no para te ora cu yega na algo constructivo. Mester cuminsa mira otro den wowo atrobe, maske pa e propio futuro di e dos partidonan grandi mes. Pasobra si bo wak e cantidad di hende cu a asisti e evento di gobierno na parlamento y esnan cu ta awo para protesta na Macuarima pa libra e detenidonan, mester constata cu niun di dos tin e acogida tan desea.

Top Ads
Top Ads
Top Ads

About The Author

Related posts

1 Comment

  1. Tacamahaca

    Mi no ta mee eens cubo cu sanger cayente no ta un asset, corda si full e mundo aki ta yen hende sanger friu, lo mundo lo ta hopi laaf. Si no twt existi hende sanger cayente hopi cos no a wordo logra den bastante parti di e planeta aki.

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.