CMB BD

Kalichi

Top Ads
Top Ads
Top Ads

Parce cu e dilema di siglo a cuminsa bira un conflicto den seno di gobierno. Manera tabata di sospecha – wel, bo no por echt yame sospecho pasobra ya ora a anuncia cu nan lo kier desaroya e hotel a bisa cu un condicion fuerte pa nan tabata cu nan lo no tin bista riba e refineria -, Bahia Principe a pone su pia abou y a bisa ‘make up your mind’. Of bo kier un hotel, of un refineria. Awo nos sa pakico te dia di awe nan no a pone ni un bloki. Es mas, tin hende ta bisa cu te ainda nan ni a haci un asina yama ‘geo-technical’ survey riba e tereno, locual ta basicamente un sondeo di e subsuelo pa wak si no tin cueba eybou cu por cay den otro unabes cu tin peso di mega-edificio riba dje. Kalichi ta fuerte, pero no dje fuerte ey cu por djis yega pone, aparentemente. E division den gobierno ta palpabel y te hasta e corant mas leal na gobierno ta papiando di un desbalanse, sugeriendo pa toch bay pa e refineria. Algo cu por cierto lo no a cay den bon tera cerca minister di Turismo, cu di su banda ainda ta kere fervientemente den e proyectonan di hotel cu awo ta on hold pasobra gobierno no a tuma un decision fiho. Of bo ta scohe pa e refineria of bo ta scohe pa futuro y felicidad di San Nicolas.

Pero, tin algo cu no ta sinta full bon. Bo no ta haya straño cu tur e añanan aki, net nada no por a wordo construi riba loke eigenlijk ta un di e ultimo pidanan enorme di real estate, no solamente na Aruba pero den Caribe? Djis imagina bo ta para riba Seroe Colorado mes y bo ta wak e area entre Colony y Boca Grandi. E ta basta grandi y practicamente bashi. Una bes cu bo pasa Lago Heights y De Vuyst, ta mane tempo a para keto. Naturalmente tin e refineria, pero den serio bo no ta kere cu hopi tempo pasa un gobierno of comerciante lo mester a desaroya maske ta algo chikito eynan? Un krenchi di vivienda, un oficina, un warehouse, loque sea? Tanto nos ta sclama cu no tin espacio akiriba y ata un pida gigantesco sin nada riba dje. Ami ta keda haya esey un poco straño. Riba dje, pa hopi tempo Colony a keda neglisha. Si, e refineria ta eybanda mes, pero ami ta keda haya increibel cu riba nos mercado limita di vivienda e lugar ey no a wordo drecha y yena cu hende di cualkier modo hopi tempo pasa. Wak, si un compania hotelero no kier construi eynan pa motibo di e bista riba e refineria, mi por compronde esey ainda, sure. Pero nada otro? Pakico? Lo ta pasobra refinahe di petroleo ta hopi mas peligroso cu nos a wordo conta tur e añanan aki?

For di hopi tempo caba tin un storia andando cu tin of tabatin materialnan canceroso y te hasta radioactivo cu a wordo uza den e proceso di refinahe den buraconan riba tereno di refineria. Tin hende – cu basta autoridad tambe – cu lo bisabo cu a move e materialnan aki for di e isla hopi tempo pasa caba. Otronan sinembargo ta bisa cu keto bay tin warda ainda, den dos buraco cu a wordo coba y cera cu concrete na 1988. Por ta e storianan aki lo a percura pa posibel inversionistanan hala atras. Por ta e ta un mito y simplemente e holor fuerte di e refineria caba a percura tene e area bashi. Por ta e ta berdad y e incidencia relativamente mas halto di cancer p’ariba di brug lo por tin algo di haber cune. Ami no sa, pero e storia a persisti pa hopi largo y si tin un momento pa busca claridad, e ta awo.

Top Ads
Top Ads
Top Ads

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.