CMB BD

Orguyo

Top Ads
Top Ads
Top Ads

Durante weekend cu a pasa parti Caribense di Reino a saca cara na Amsterdam, ganando premio pa e miho boto di carosa den e Gay Pride. Pa prome biaha homosexualnan, bisexualnan, transgender, etcetera a presenta nan mes na e evento grandi y hopi popular aki. Gran cantidad di medionan Hulandes a duna nan atencion, mustrando riba hecho cu, contrario cu na Hulanda, gruponan aki no ta haya aceptacion completo den otro partinan di Reino. Primordial den esaki ta e derecho di por casa cu otro.

Na Hulanda mes, ambtenaarnan no mag di nenga pa casa parehanan di mesun sexo mas. Apenas un aña pasa esey a bira ley por cierto, pues tambe na Hulanda cu tin e reputacion di ta asina liberal e tema aki ta keda un struggle, aunke cu e asina yama ‘weigerambtenaren’ tabata un menoria. Na Merca poco tempo pasa Corte Supremo a dicidi cu parehanan gay por casa den tur estado. Mi ta corda con grandi e celebracion tabata – a lo menos riba Facebook unda cantidad di hende a dorna nan profile pic cu e bandera di arco iris -, tambe na Aruba. Tur cos bou di e lema: Amor ta amor.

Diez, por ta hasta cinco aña pasa esaki probablemente lo no a pasa. Ta bon pa mira con poco poco, cu cambio di cada generacion practicamente, actitudnan ta cambiando y mas hende ta adoptando un postura di aceptacion. Pero e berdad ta cu tin hopi caminda mas pa bay ainda. Akinan nos no ta tira homosexualnan for di toren di misa manera na lugarnan unda ISIS ta manda, pero te ainda muchanan ta wordo forsa pa sali for di cas y te hasta ta purba mata nan mes, djis pasobra nan mayornan no por biba cu e hecho cu nan ta ken nan ta. Te ainda tin homber y muhe scapa ta biba un mentira – tin biaha hasta cu BFF cu a casa cu nan pa mantene apariencia – pa por djis keda existi y gana nan placa. E ta dificil pa imagina con duro bida mester ta pa nan. Nos por aparenta di ta hopi chill cu nos rainbow-profile pics, pero e stigma tey mesun duro te ainda, diep den nos cultura y den nos bida diario. Por ehempel, si bo kier haci daño na un hende su reputacion, djis plama e redo cu abo a tende cu su mesun casa a catch e den cama cu su amigo. Of cu ora e bebe net un tiki dimas, e ta cuminsa actua straño. Of cu e ta lesbiana. Anyway, bo por tin bo pareha y cinco yiu na cas y kizas te hasta un byside cu tres mucha mas eyfo, pero un biaha cu e rumor ey ‘stick’, b’a coy awa.

Awo, bo por purba di conscientisa hende cu esey no ta mustra cu nos ta e pais moderno y tolerante cu nos ta gusta bisa cu nos ta, pero e berdad ta cu bo no kier purba kibra hero cu bo man. Aruba ta y lo keda conservativo te na un cierto punto. Bo lo no mira un Gay Pride den nos cayanan por lo pronto. Riba dje e caminda pa aceptacion ta uno hopi individual. Puntra Obama, cu a admiti cu su actitud a evoluciona durante añanan. Ami mes, tempo mi tabata hoben, tabatin e mesun actitud criyoyo di homofobia cu mayoria di hende akinan a lanta cune. Si bo tabata sa di un homosexual den bo bisindario, por ehempel na scol, bo tabata tente ora e oportunidad tabata presenta su mes y fuera di esey bo tabata keda leu. Pasobra Dios libra bo papia cu ne, cera un amistad anto hende cuminsa papia. Ta te ora cu mi a bay Hulanda, topa e mama di mi yiu y cera conoci cu dos ruman di dje cu pa casualidad tabata gay, cu mi insiguridad y actitud di buchi a kita. Ambos tabata biba nan bida na un manera habri, sin niun berguenza, den relacionnan hopi stabil y convencional cu nan pareha. Nan tabata hendenan trankilo y hopi amabel. Es mas, poco biaha prome of despues mi a topa parehanan cu mas stimacion y dedicacion pa otro. Awo, abo bisami, si akinan hende ta casa den nos Stadhuis djis pa permiso di estadia, pakico e hendenan aki no pa amor?

Pa hopi hende akinan, e argumento contra ta religion. Esey ta algo cu mester respeta, mi ta haya. Tin libertad di religion y si un misa no kier efectua casamento pa parehanan di mesun sexo, anto esey mester keda nan prerogativo. Pero Stadhuis no ta misa, y no tin niun pastoor eynan ta casando hende. Y riba dje tin – danki Dios – e separacion formal entre misa y estado. Pues ken nos ta ofendiendo anto si nos laga hende di mesun sexo casa pa Raad akinan? Pakico djis lage na Registro Civil, ora tin boshi placa pa gana? Si Aruba di berdad kier diversifica su mercado turistico y atrae hende cu placa, ata e mercado perfecto eynan. Hopi di nan tin smaak caro, nan gusta sali y nan tin placa pa gasta pasobra nan tin bon trabou y no tin yiu. Kico mas bo kier?

Pero fuera di ganashi, amplia e derecho pa casa pa Raad mas cu nada ta un cuestion di consenshi. E ta e cos drechi pa haci. Nos por sigui laga nos rumannan, yiunan, tionan, primonan y amigonan no tuma parti completamente den nos comunidad, basicamente nengando nan e derecho fundamental di comparti nan bida formalmente y legalmente, cu tur e ‘lusten’ y ‘lasten’, dus tambe por ehempel e derecho di laga propiedad pa bo pareha den testament despues di morto. Of nos por gewoon haci drechi pa caba. Casamento ta fiesta. Pakico nenga hende un fiesta? No ta Arubiano nos ta?

Top Ads
Top Ads
Top Ads

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.