Mindset

Top Ads
Top Ads

Cada tanto tempo bo ta mira e patronchi ta bin bek. Pelea, atraco pisa, robo, tiroteo. Tur esaki causando gritonan riba social media cu Aruba ta bayendo perdi. Ora casonan ta tuma luga manera di e taxista cu a haya bala den wowo of e señora cu den pleno dia patras di caya grandi a haya cuchiu riba su garganta, sentimentonan di rabia y miedo ta apodera di nos colectivamente. Mas ainda si ta trata di hobennan cu ta comete e crimennan aki. E ora nos ta puntra con leu cos tin cu bay, unda gobierno ta pa pone ordo, nos ta yora pa bin cu boot camp, etcetera, etcetera. Pero ban ta serio.

Loke aparentemente nos ta keda lubida ta e causanan enorme tras di e tipo di actonan aki. E ta casi manera un tapadera di beerput ta wordo habri un rato pero niun hende kier wak aden y mira pakico e pos ta bashando y ta purba yama chica pos di biaha. Seis aña y mei pasa mi bin bek Aruba despues di 12 aña y mei na Hulanda na unda mi a studia, fiesta y traha. Prome cu esey mi mayornan practicamente a scop mi te na e finishline pa mi caba Colegio. Mi tin dimas suerte cu mi famia y mi ta gradecido na nan pa semper. Nan a pone enfasis riba mi educacion y hasta ora ami mes no tabata hacie, nan si a wak pa mi futuro. Amigonan dimi cu riba dje no tabata bin di placa a bay dilanti pasobra nan mayornan a pusha nan pa supera nan mes y siña nan e balor di traha duro. Otro amigonan di otro scol, cu mama soltero y cu tabata gusta caya, awe mi ta wak nan como tata di famia, cu nan famia riba un trip di famia. Trankilo, suave, sigur di nan mes y nan luga den bida y cu muchanan cu ta stima nan pasobra nan hasta por wel di ta rabo sushi pafo di cas, pero nan ta percura di tey tur dia y ta e centro di nan universo. Pues e mentalidad rekeri pa progresa no ta mara necesariamente na clase social. Ami cubo sa tambe di boshi otro hende cu a lanta cu tur cos den nan fabor y a caba na nada toch. Pasobra e balornan rekeri, ban ta franco, no necesariamente bo ta nace cu nan. Sea un of mas persona ehemplar – ni mester ta famia- of circumstancianan den cual ba wordo forsa pa crece ta laganan atras cerca bo. Por ta hasta te hopi laat of na malo bo ta siña nan. Pero e chens mas grandi cu bo ta haya e pida fundeshi ey pa bo bida ta na cas, den bario y na scol.

Tin cantidad di casonan extremo cu nos ta tende di nan, via amigonan, prensa y social media. Rumornan y noticia di abuso sexual, violencia, suicidio, prostitucion te hasta. Awendia e manera cu nos ta deal cu informacion ta cu nos ta wak e pasa riba nos timeline y ta pone un comment y nos ta lage bay te ora algo otro tuma luga cu ta gara nos atencion. Ya caba mayoria di nos a lubida di e mucha muhe cu a mata su curpa poco siman pasa. Ami tambe, mescos cubo. Pensa riba esey un rato. Pensa riba kico nos por haci riba un nivel personal, como conocirnan y bisiña. Si acaso esey por. Y lagami sa, pasobra ami mes no sa ainda. Loke si mi a ripara ta cu nos como pais, ciudadanonan y gobiernonan consecutivo, no sa con pa balansa prosperidad y bienestar. Por ta nos ni sa kico e diferencia ta. Nos ta inverti den economia, infrastructura, prestigio y material. Nos ta hinca nos mes den debenan cu nos no por paga bek te hasta. Pero di baina nos ta hinca recursonan den educacion of ayudo social. Si a lo menos un di nan lo tabatin e presupuesto cu turismo tin, Aruba lo ta un isla hopi diferente. Pero nos mes no ta pidi pa e cosnan aki. Nos kier e easy fix pa nos mes, y mescos cu politiconan y gobernantenan pa ken proyectonan asina no ta duna resultado na tempo pa nan saca portret cu nan, nos no ta pensa mas leu cu cuater aña. Nos tur ta condiciona pa decadas caba na e tipo di mindset aki. Y asina, pa tanto cu nos ta kere cu nos ta bay dilanti, nos ta keda atras y gran parti di nos muchanan y hobennan ta haya nan mes pega den situacionnan for di cual probablemente e unico manera pa sali ta na malo. Anto e ora nos ta lanta un rato atrobe y sclama cu cos ta bayendo robes, pa despues sigui scroll bay abou.

Top Ads
Top Ads

About The Author

Related posts

1 Comment

  1. Raffy Kock

    Hopi bon articulo Arien. Y e aprecio pa un hende cu ta biba aki y ta skirbi riba e cosnan aki ta masha grandi mes. Aruba a crece den material y momentonan asina ta pone nos reflecciona pero e mester bai mas leu. Ta berdat cu nos educashon ta falta cierto cosnan. Pero con nos por logra mantene un idea di comunitarismo den un era unda material y status a bira algo asina importante? Un cos mi por bisabo, problemanan aki ta fantasticamente facil pa resolve. Pesey e ta fantasticamente dificil pa compronde con bin nos no ta yegando na haci pasonan den direccion di e cambionan aki. Pero mester purba y ariculonan asina ta yuda sumamente hopi. Danki.

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.